اسرائیل کا مقصد خطے میں جنگ کو طول دینا ہے:اردنی وزیرِ خارجہ

 اسرائیل کا مقصد خطے میں جنگ کو طول دینا ہے:اردنی وزیرِ خارجہ

اردن کے وزیرِ خارجہ ایمن الصفدی نے خبردار کیا ہے کہ اسرائیل کی پالیسیوں کا اصل مقصد خطے میں تنازع کو لمبا کرنا اور اپنی توسیع پسندانہ عزائم کو فلسطین سمیت لبنان و شام تک پھیلانا ہے۔

الصفدی نے ماسکو میں اپنے روسی ہم منصب سرگئی لاوروف کے ساتھ مشترکہ پریس کانفرنس میں کہا کہ عالمی برادری کو فوری طور پر اسرائیل کو روکنے کے لیے اقدامات کرنا ہوں گے، کیونکہ اس کی موجودہ حکمتِ عملی صرف تباہی اور مزید جنگ کو جنم دے رہی ہے۔

انہوں نے واضح کیا کہ خطے کے استحکام کے لیے واحد مؤثر راستہ عرب امن منصوبہ اور دو ریاستی حل ہے۔ تاہم اسرائیلی وزیراعظم غزہ میں نسل کشی اور مغربی کنارے میں جارحیت کے ذریعے ایک خطرناک منصوبہ آگے بڑھا رہے ہیں۔

اردنی وزیرِ خارجہ نے کہا کہ اسرائیلی اقدامات شام اور لبنان کی صورتحال کو مزید خراب کر رہے ہیں۔ انہوں نے مطالبہ کیا کہ اسرائیل فوری طور پر جنگ بندی کے عالمی مطالبات کا جواب دے اور غزہ کی انسانی بحران کو ختم کرنے کے لیے تعاون کرے۔

الصفدی نے غزہ میں اسرائیلی مظالم کے خلاف روس کے مؤقف کو سراہا اور کہا کہ اردن قطر، مصر اور امریکہ کی جانب سے جنگ بندی کے لیے جاری کوششوں کی حمایت کرتا ہے۔ انہوں نے یورپی ممالک کے فلسطین کو تسلیم کرنے کے فیصلے کا خیر مقدم کیا اور دیگر ممالک سے بھی اس عمل میں شامل ہونے کی اپیل کی۔

شام کے حوالے سے الصفدی نے کہا کہ اردن، دمشق اور واشنگٹن کے ساتھ مل کر صوبہ سویدا کے مسائل کے حل پر کام کر رہا ہے۔ ان کا کہنا تھا کہ شام کی سالمیت اور شہریوں کی حفاظت ضروری ہے، جب کہ اسرائیلی جارحیت وہاں بحران کو مزید سنگین بنا رہی ہے، جس کا فوری خاتمہ ہونا چاہیے۔