اسرائیل کا فلسطینی اور عرب اراضی پر قبضہ غیر قانونی ہے:مصر

?️ 22 فروری 2026

اسرائیل کا فلسطینی اور عرب اراضی پر قبضہ غیر قانونی ہے:مصر

مصر کی وزارت خارجہ نے امریکی سفیر کے حالیہ بیان پر سخت ردعمل دیتے ہوئے واضح کیا ہے کہ اسرائیل کو مقبوضہ فلسطینی یا کسی بھی عرب سرزمین پر کوئی حاکمیت حاصل نہیں۔

مصری وزارت خارجہ نے اپنے بیان میں کہا کہ تل ابیب میں تعینات امریکی سفیر مائیک ہکبی کے وہ بیانات، جن میں اسرائیل کو عرب ممالک کی اراضی پر قبضے کا حق دینے کی بات کی گئی، بین الاقوامی قوانین اور اقوام متحدہ کے منشور کی صریح خلاف ورزی ہیں۔

بیان میں مزید کہا گیا کہ یہ مؤقف امریکی صدر ڈونلڈ ٹرمپ کے نقطۂ نظر، غزہ جنگ کے خاتمے سے متعلق بیس نکاتی منصوبے اور گزشتہ ہفتے واشنگٹن میں منعقدہ امن کونسل کانفرنس کے نتائج سے بھی متصادم ہے۔

مصر نے زور دیا کہ اسرائیل کو مقبوضہ فلسطینی علاقوں یا کسی اور عرب خطے پر کوئی خودمختاری حاصل نہیں اور قاہرہ مغربی کنارے کے الحاق یا اسے غزہ سے جدا کرنے کی کسی بھی کوشش اور آبادکاری کی سرگرمیوں کی سخت مخالفت کرتا ہے۔

امریکی سفیر نے ایک انٹرویو میں دعویٰ کیا تھا کہ اسرائیل کو دریائے نیل سے دریائے فرات تک پھیلے علاقوں پر حق حاصل ہے۔ یہ بیان انہوں نے امریکی صحافی ٹکر کارلسن کو دیے گئے انٹرویو میں دیا۔

قطری نشریاتی ادارے الجزیرہ کے مطابق یہ بیانات مذہبی نوعیت کے بیانیے اور امریکی خارجہ پالیسی کے درمیان بڑھتی ہوئی ہم آہنگی کی عکاسی کرتے ہیں اور ساتھ ہی امریکہ کے دائیں بازو کے حلقوں میں اسرائیل کی حمایت کی حدود سے متعلق اختلافات کو بھی نمایاں کرتے ہیں۔