اسرائیلی قیدیوں کے اہلِ خانہ کا کابینہ وزراء کے گھروں کے باہر احتجاج،جنگ ختم کرنے کا مطالبہ

اسرائیلی قیدیوں کے اہلِ خانہ کا کابینہ وزراء کے گھروں کے باہر احتجاج،جنگ ختم کرنے کا مطالبہ

اسرائیلی قیدیوں کے اہلِ خانہ نے وزیراعظم نیتن یاہو کی کابینہ کے وزراء کے گھروں کے باہر مظاہرے کرتے ہوئے الزام لگایا ہے کہ حکومت جان بوجھ کر غزہ میں قیدیوں کے تبادلے کے معاہدے میں رکاوٹ ڈال رہی ہے۔

اطلاعات کے مطابق مظاہرین نے وزیر جنگ اسرائیل کاتس کے گھر کے سامنے جمع ہوکر اپنے پیاروں کی رہائی کا مطالبہ کیا۔ اسی طرح دیگر وزراء کے گھروں کے باہر بھی احتجاج کیا گیا۔

مظاہرین نے کہا کہ حکومت کو چاہیے کہ جنگ ختم کرے اور قیدیوں کی واپسی کے لیے موجودہ پیشکش پر فوری طور پر فیصلہ کرے۔ انہوں نے اعلان کیا کہ احتجاجی سلسلہ پورے ہفتے جاری رہے گا اور منگل کو یومِ یکجہتی منایا جائے گا۔

قیدیوں کے اہلِ خانہ نے جنگی کابینہ کی پالیسیوں پر بھی تنقید کی اور کہا کہ غزہ پر فوجی حملے اور جنگ کو طول دینا صرف ہمارے بیٹوں کی جان خطرے میں ڈال رہا ہے۔ ان کا کہنا تھا کہ ہم اس رکاوٹ کو قبول نہیں کریں گے اور فوری طور پر قیدیوں کی رہائی اور جنگ کے خاتمے کا مطالبہ کرتے ہیں۔

یہ احتجاج ایسے وقت میں ہو رہا ہے جب اسرائیلی حکومت نے غزہ پر مکمل قبضے کا فوجی منصوبہ منظور کیا ہے جس کے تحت 60 ہزار ریزرو فوجیوں کو بلانے کی منظوری دی گئی ہے۔ اس فیصلے نے مقبوضہ فلسطینی علاقوں میں انسانی بحران کو مزید گہرا کر دیا ہے۔

گزشتہ دنوں تل ابیب اور دیگر شہروں میں بھی ہزاروں اسرائیلی شہری حکومت کے خلاف سڑکوں پر نکل آئے تھے اور نیتن یاہو پر زور دیا تھا کہ حماس کے ساتھ قیدیوں کے تبادلے کا معاہدہ کرے۔ مظاہرین نے متنبہ کیا کہ غزہ پر حملہ قیدیوں کی جانوں کے ضیاع کا سبب بن سکتا ہے، جبکہ بات چیت ہی ان کی زندگیاں بچا سکتی ہے۔