دنیا

اسرائیلی فوج میں استعفوں کی لہر، قیدیوں کے امور کے سربراہ نیتصان آلون نے بھی استعفی دے دیا

03
نومبر

?️ 3 نومبر 2025

اسرائیلی فوج میں بڑھتے ہوئے اختلافات اور اندرونی بحران کے دوران، نیتصان آلون، جو کہ قیدیوں اور لاپتہ افراد کے امور کے سربراہ تھے، نے اپنے عہدے سے استعفیٰ دے دیا ہے۔

اسرائیلی روزنامہ ہارٹز کے مطابق، فوج نے اتوار کی شب اعلان کیا کہ آلون نے فوجی سربراہ ایال زمیر کے ساتھ مشاورت کے بعد اپنے منصب سے علیحدگی پر اتفاق کر لیا ہے۔

نیتصان آلون کو سابق چیف آف اسٹاف ہرتصی ہالوی نے غزہ جنگ کے آغاز (15 اکتوبر 2023) کے موقع پر اس عہدے پر تعینات کیا تھا۔ وہ قیدیوں اور لاپتہ اسرائیلی فوجیوں کے بارے میں مذاکراتی ٹیم کے اہم رکن بھی تھے۔

اس سے قبل اسرائیلی تجزیہ کار بن کسپیت نے انکشاف کیا تھا کہ وزیر اعظم بنیامین نیتن یاہو اور نیتصان آلون کے درمیان قیدیوں کے معاملے پر شدید اختلافات ہیں، اور نیتن یاہو انہیں برطرف کرنے کا ارادہ رکھتے ہیں۔

آلون کا استعفیٰ ایسے وقت سامنے آیا ہے جب اسرائیلی فوج کو فلسطینی قیدیوں پر “سده تیمن” جیل میں ہونے والے تشدد کے انکشافات کے باعث شدید تنقید کا سامنا ہے۔

اس تنازعے کے بعد فوجی چیف نے فوجی اٹارنی جنرل یفعت تومر یروشلیمی کو اس الزام پر برطرف کر دیا ہے کہ انہوں نے ہی قیدیوں پر تشدد کی تفصیلات میڈیا کو فراہم کیں۔

تجزیہ کاروں کے مطابق، اسرائیلی فوج میں استعفوں اور اختلافات کی یہ نئی لہر اس بات کی نشاندہی کرتی ہے کہ غزہ جنگ اور داخلی بحران نے تل ابیب کی عسکری قیادت کو گہرے دباؤ میں مبتلا کر دیا ہے۔

Short Link

Copied