اسرائیلی سفیر کو اخلاقی بے راہ روی کی وجہ سےجلد امارات سے واپس بھیجا جائے گا

اسرائیلی سفیر کو اخلاقی بے راہ روی کی وجہ سےجلد امارات سے واپس بھیجا جائے گا

 اسرائیلی میڈیا نے انکشاف کیا ہے کہ متحدہ عرب امارات میں تعینات اسرائیل کے سفیر یوسی شلی کو ایک اخلاقی اسکینڈل کے باعث جلد ہی اپنا عہدہ چھوڑنا پڑے گا، اور وہ تل ابیب واپس جا رہے ہیں۔

فلسطینی خبررساں ایجنسی معا کے مطابق، اسرائیلی چینل 12 نے رپورٹ کیا ہے کہ یوسی شلی، جو ماضی میں وزیر اعظم کے دفتر کے ڈائریکٹر جنرل بھی رہ چکے ہیں، اپنے غیر اخلاقی رویے کے باعث سفارتی حلقوں میں تنازع کا شکار ہوئے ہیں۔

اماراتی حکام نے ان کی موجودگی پر ناراضی کا اظہار کیا ہے، اور اسی باعث اسرائیلی حکومت کے قریبی ذرائع ان کے لیے اسرائیل میں کوئی نئی ذمہ داری تلاش کر رہے ہیں۔

رپورٹس کے مطابق، یوسی شلی کچھ مہینے قبل امارات میں ایک بار (شراب خانے) میں غیر مناسب رویہ اختیار کرتے پائے گئے۔ یہ واقعہ سفارتی آداب اور اخلاقیات کی کھلی خلاف ورزی سمجھا گیا، جس پر اماراتی حکام نے سخت ناپسندیدگی کا اظہار کیا۔

اسرائیلی چینل 11 نے بھی گزشتہ ہفتے انکشاف کیا تھا کہ اماراتی حکومت اور اسرائیلی سفیر کے درمیان کشیدگی بڑھ گئی ہے۔ اسرائیلی سفیر کے سیکیورٹی عملے نے بھی اس واقعے کی رپورٹ اعلیٰ حکام کو دے دی تھی۔

اس واقعے کے منظرعام پر آنے کے بعد اسرائیلی سیاسی اور سفارتی حلقوں میں ہلچل مچ گئی ہے، اور اس بات پر شدید تنقید کی جا رہی ہے کہ ایک ایسا شخص جو دو ملکوں کے درمیان تعلقات کا نمائندہ ہو، ایسی حرکتوں کا مرتکب ہوا ہے۔ ایک اماراتی ذرائع کے مطابق، ایسے رویے سے دونوں ممالک کے تعلقات پر منفی اثر پڑتا ہے۔

یاد رہے کہ 25 ستمبر 2020 کو متحدہ عرب امارات اور اسرائیل کے درمیان امن معاہدہ امریکہ کے سابق صدر ڈونلڈ ٹرمپ کی موجودگی میں طے پایا تھا، جس کے بعد دونوں ممالک کے درمیان باضابطہ تعلقات قائم ہوئے۔

یہ معاہدہ مسلم دنیا، بالخصوص فلسطینی مزاحمتی گروپوں کی شدید تنقید کا نشانہ بنا۔ فلسطینی رہنماؤں نے اس اقدام کو "فلسطینی کاز کے خلاف غداری اور صہیونی جرائم پر پردہ ڈالنے کی کوشش” قرار دیا تھا۔