اسرائیلی حکام نے کینیڈین پارلیمانی وفد کو مغربی کنارے میں داخلے ہونے سے روک دیا

?️ 17 دسمبر 2025

اسرائیلی حکام نے کینیڈین پارلیمانی وفد کو مغربی کنارے میں داخلے ہونے سے روک دیا

 صہیونی حکام نے کینیڈا کی پارلیمنٹ کے ایک وفد کو مغربی کنارے میں داخل ہونے سے روک دیا ہے۔ میڈیا رپورٹس کے مطابق یہ واقعہ النبی کراسنگ پر پیش آیا جہاں اسرائیلی اہلکاروں نے چھ رکنی کینیڈین پارلیمانی وفد کو فلسطینی علاقوں میں داخلے کی اجازت نہیں دی۔

اطلاعات کے مطابق اسرائیلی سفارت خانے نے کینیڈا میں وضاحت دی ہے کہ اس وفد کو اس بنیاد پر روکا گیا کیونکہ اس کے بعض ارکان کا تعلق ایک غیر سرکاری تنظیم ’’اسلامک ریلیف ورلڈ وائیڈ‘‘ سے بتایا گیا ہے، جسے اسرائیل ایک نام نہاد دہشت گرد تنظیم قرار دیتا ہے۔ دوسری جانب کینیڈا کی وزیر خارجہ انیتا آنند نے سوشل میڈیا پر بیان جاری کرتے ہوئے کہا ہے کہ کینیڈا اس وفد کے ساتھ کیے گئے نامناسب سلوک پر باضابطہ احتجاج کر چکا ہے۔

کینیڈا کی رکن پارلیمنٹ اقرا خالد نے وزیر اعظم مارک کارنی کو بتایا کہ وہ خود اس وفد میں شامل تھیں اور اسرائیلی اہلکاروں نے سرحد پر ان کے ساتھ بدسلوکی کی، حتیٰ کہ انہیں کئی مرتبہ دھکے بھی دیے گئے۔ ان کا کہنا تھا کہ النبی کراسنگ پر اسرائیلی حکام نے ان سے سخت تفتیش کی حالانکہ وہ جانتے تھے کہ وہ کینیڈا کی منتخب رکن پارلیمنٹ ہیں، کیونکہ ان کے پاس سفارتی نوعیت کا خصوصی پاسپورٹ موجود تھا۔

یہ واقعہ ایسے وقت میں سامنے آیا ہے جب اسرائیلی حکومت مغربی کنارے میں یہودی بستیوں کو مزید وسعت دینے کے اقدامات کر رہی ہے۔ حال ہی میں اسرائیلی وزیر خزانہ بتسلئیل اسموتریچ نے مغربی کنارے میں 19 نئی بستیوں کو قانونی حیثیت دینے کا منصوبہ کابینہ کے سامنے پیش کیا، جسے منظوری بھی دے دی گئی۔ اسرائیلی میڈیا کے مطابق ان میں سے بعض بستیاں مکمل طور پر نئی ہیں جبکہ کچھ کو اسرائیلی قوانین کے تحت باقاعدہ شکل دی جا رہی ہے۔

واضح رہے کہ 1967 میں مغربی کنارے اور القدس پر قبضے کے بعد اسرائیل نے ان علاقوں میں سینکڑوں یہودی بستیاں قائم کی ہیں۔ اقوام متحدہ متعدد بار ان بستیوں کو غیر قانونی قرار دے چکا ہے، تاہم اسرائیل نہ صرف ان قراردادوں کو نظرانداز کرتا آ رہا ہے بلکہ فلسطینی علاقوں میں آبادکاری کے عمل کو مزید تیز کر رہا ہے۔