اسرائیلی آرمی چیف کے گھر کی دیواریں سرخ رنگ سے رنگ دی گئیں

اسرائیلی آرمی چیف کے گھر کی دیواریں سرخ رنگ سے رنگ دی گئیں

اسرائیلی میڈیا کے مطابق تل ابیب میں اسرائیلی آرمی چیف ایال زامیر کے گھر کے اطراف اور دیواروں کو نامعلوم مظاہرین نے سرخ رنگ سے رنگ دیا۔ یہ اقدام ان مظاہرین کی جانب سے کیا گیا جو غزہ پر جاری جنگ کے مخالف اور حماس کے ساتھ قیدیوں کے تبادلے کے معاہدے کے حامی ہیں۔

جمعرات کی شام ہونے والے احتجاج میں مظاہرین نے آرمی چیف کے گھر کے باہر جمع ہو کر جنگ کے تسلسل کے خلاف نعرے لگائے اور سروں پر سرخ رنگ کی بالٹیاں انڈیل کر دیواروں کو سرخ کر دیا۔ ان کا کہنا تھا کہ یہ رنگ غزہ میں جاری خونریزی کی علامت ہے۔

اس سے قبل بھی اسرائیل میں ہزاروں افراد مختلف شہروں میں مظاہرے کرتے ہوئے وزیر اعظم بنیامین نیتن یاہو کی جنگی پالیسیوں کے خلاف سراپا احتجاج بن چکے ہیں۔ مظاہرین نے مطالبہ کیا ہے کہ فوری طور پر جنگ بند کر کے حماس کے ساتھ قیدیوں کے تبادلے کا معاہدہ کیا جائے اور غزہ میں ہونے والے مظالم کا خاتمہ کیا جائے۔

واضح رہے کہ اسرائیل نے 7 اکتوبر 2023 کو حماس کے خلاف جنگ شروع کی تھی جس کا مقصد حماس کو ختم کرنا اور صیہونی قیدیوں کو واپس لانا تھا، لیکن دونوں اہداف حاصل نہ ہو سکے۔ بالآخر جنوری 2025 میں ایک معاہدے کے تحت جنگ بندی اور قیدیوں کا تبادلہ ہوا۔

تاہم، اسرائیلی حکومت نے بعد ازاں جنگ بندی کے دوسرے مرحلے پر مذاکرات سے انکار کر دیا اور مارچ 2025 کے اواخر میں دوبارہ غزہ پر فوجی حملے شروع کر دیے، جس پر اندرونِ اسرائیل ہی مخالفت میں مزید اضافہ دیکھنے کو مل رہا ہے۔