آئندہ ہفتے عین الاسد اڈے سے بین الاقوامی اتحادی افواج کا انخلا

?️ 1 جنوری 2026

آئندہ ہفتے عین الاسد اڈے سے بین الاقوامی اتحادی افواج کا انخلا

 عراق کے نائب کمانڈر مشترکہ آپریشنز قیس المحمداوی نے اعلان کیا ہے کہ بین الاقوامی اتحادی افواج آئندہ ایک ہفتے کے اندر صوبہ الانبار میں واقع عین الاسد فوجی اڈے سے نکل جائیں گی۔

عراقی میڈیا کے مطابق قیس المحمداوی نے بدھ کے روز ایک پریس کانفرنس میں بتایا کہ سال 2025 کے دوران عراق نے نمایاں سکیورٹی کامیابیاں حاصل کیں اور دہشت گردانہ کارروائیوں میں واضح کمی آئی۔ ان کے مطابق سرحدی دراندازی کی شرح صفر تک پہنچ گئی ہے۔

انہوں نے کہا کہ رواں سال ڈرون حملوں میں 39 دہشت گرد ہلاک کیے گئے جبکہ داعش کے اہم کمانڈر ابو خدیجہ، جو تنظیم کا نام نہاد والی کہلاتا تھا، ایک خصوصی آپریشن میں اپنے ساتھیوں سمیت مارا گیا۔ المحمداوی کے مطابق ان کامیابیوں کے پیچھے مؤثر انٹیلی جنس اور زمینی کارروائیاں کارفرما رہیں۔

عراقی نائب کمانڈر نے مزید بتایا کہ سال 2026 میں دیگر صوبوں کی سکیورٹی کی ذمہ داری مکمل طور پر وزارت داخلہ کے حوالے کر دی جائے گی، جبکہ پیشمرگہ فورسز کے ساتھ مشترکہ علاقوں میں سکیورٹی تعاون جاری رہے گا۔

واضح رہے کہ اس وقت عراق میں تقریباً 2500 امریکی فوجی بین الاقوامی اتحاد کے تحت موجود ہیں، جو 2014 میں داعش کے خلاف کارروائیوں کے لیے قائم کیا گیا تھا۔ یہ افواج عین الاسد، اربیل کے حریر اڈے اور بغداد ایئرپورٹ کے قریب واقع کیمپ وکٹوریہ میں تعینات ہیں۔

امریکی افواج کے علاوہ فرانس، برطانیہ اور آسٹریلیا کی فوجی یونٹس بھی اتحادی مشن کا حصہ ہیں، جبکہ نیٹو کے تحت بھی محدود تعداد میں غیر ملکی فوجی عراق میں موجود ہیں۔