حالیہ صیہونی جنگی جارحیت کے پیچھے چھپے اصل مقاصد کیا تھے؟ 

سچ خبریں:اطالوی تجزیہ کار سیلویا بولٹوک کے مطابق اسرائیل کی حالیہ جنگی جارحیت کا اصل ہدف ایران کو کمزور کرنا، فلسطینیوں کا خاتمہ اور خطے کے وسائل پر قبضہ جمانا ہے، پاکستان بھی اس جارحیت کے نشانے پر ہے۔

اطالوی تھنک ٹینک اسپیشل یوریشیا کی بانی اور ایگزیکٹو ڈائریکٹر سیلویا بولٹوک نے خصوصی گفتگو میں انکشاف کیا ہے کہ اسرائیل کی حالیہ جارحیت صرف وقتی یا دفاعی نوعیت کی نہیں، بلکہ اس کے پسِ پردہ خطے پر تسلط قائم کرنے کا ایک وسیع تر منصوبہ ہے جس کے اہداف میں ایران کی حکومت گرانا، فلسطینیوں کو بین الاقوامی طور پر تسلیم شدہ علاقوں سے بے دخل کرنا اور پاکستان کے ایٹمی پروگرام کو نشانہ بنانا شامل ہیں۔

یہ بھی پڑھیں:ایرانیوں نے امریکہ اور اسرائیل کا بھرم کیسے ختم کیا؟

بولٹوک نے اسرائیل کی حالیہ جارحیت کا جیوپولیٹکل تجزیہ پیش کرتے ہوئے کہا کہ اسرائیل خطے کے توانائی کے ذخائر پر قبضے اور علاقائی بالادستی کے ایجنڈے پر عمل پیرا ہے۔ اسرائیل چاہتا ہے کہ فلسطین کی ریاست کبھی تسلیم نہ ہو تاکہ غزہ کی سمندری حدود میں موجود گیس کے وسیع ذخائر پر اپنا قبضہ برقرار رکھ سکے۔

بولٹوک کے مطابق یوکرین جنگ کے بعد یورپ کو توانائی کے متبادل ذرائع کی تلاش ہے، اسی وجہ سے اسرائیل، بحیرہ روم میں موجود گیس کے ذخائر پر مکمل کنٹرول چاہتا ہے، غزہ کی سمندری حدود میں ایک ٹریلین کیوبک فٹ سے زائد قدرتی گیس موجود ہے، جو اسرائیل کے لیے انتہائی اہمیت کی حامل ہے، اسرائیل فلسطین کو باقاعدہ ریاست تسلیم نہیں کرنا چاہتا کیونکہ اس طرح فلسطینیوں کو سمندری حدود کے وسائل پر بین الاقوامی قوانین کے مطابق حق ملکیت حاصل ہوجائے گا۔

بولٹوک نے مغرب بالخصوص یورپ کے دوہرے معیار اور اسرائیل کی مسلسل حمایت کو شدید تنقید کا نشانہ بنایا، انہوں نے کہا کہ یورپی ممالک خصوصاً اٹلی اور جرمنی اس جارحیت کے لیے اسرائیل کو ہتھیار فراہم کر رہے ہیں اور انسانی حقوق کے نام نہاد علمبردار یورپ کے اس جرم میں برابر کے شریک ہیں، مغرب کا میڈیا بھی اسرائیل کی جانب داری کر کے اس جارحیت کو دفاع قرار دیتا ہے۔

بولٹوک کے مطابق اسرائیل ایران میں شہری اہداف کو جان بوجھ کر نشانہ بنا رہا ہے تاکہ عوام کو حکومت کے خلاف اکسایا جا سکے۔ اسرائیل کی یہ حکمت عملی دراصل ایران کے اندرونی انتشار اور حکومتی عدم استحکام کو ہوا دینے کی وسیع کوششوں کا حصہ ہے۔

انہوں نے واضح کیا کہ ایران کا آزادانہ مؤقف اور بڑھتی ہوئی دفاعی صلاحیت مغرب اور اسرائیل کے لیے ناقابلِ قبول ہے، اسی لیے ایران کو ایٹمی ہتھیاروں کے حصول کا جھوٹا الزام لگا کر حملوں کا جواز پیش کیا جا رہا ہے۔

سیلویا بولٹوک نے خبردار کیا کہ ایران کے بعد اسرائیل اور امریکہ کا اگلا ہدف پاکستان اور اس کا ایٹمی پروگرام ہے، انہوں نے کہا کہ خطے کے ممالک خصوصاً پاکستان کو چاہیے کہ اس ابھرتے ہوئے خطرے کو سنجیدگی سے لیں۔

بولٹوک نے اسرائیلی قیادت کے اس عزائم کا بھی ذکر کیا کہ اسرائیل کی نظریں عظیم اسرائیل کی تشکیل پر مرکوز ہیں، جس میں شام، لبنان اور سعودی عرب کے علاقے بھی شامل ہیں، انہوں نے کہا کہ ابراہیمی معاہدوں کے باوجود اسرائیل نے ہمیشہ اپنے توسیع پسندانہ عزائم کو ترجیح دی ہے۔

سیلویا بولٹوک نے اقوام متحدہ اور بین الاقوامی عدالت کی بے عملی پر افسوس کا اظہار کرتے ہوئے کہا کہ جب تک اسرائیل کو اس کے جرائم کے لیے جوابدہ نہیں ٹھہرایا جائے گا، عالمی قوانین اور انسانی حقوق کے تحفظ کا دعویٰ محض ایک مذاق بن کر رہ جائے گا۔

انہوں نے یورپی عوام کو مخاطب کرتے ہوئے کہا کہ اگر انہیں فلسطین اور ایران میں ہونے والے مظالم کی مکمل حقیقت کا علم ہو جائے تو یورپ کے عوام کبھی بھی اس ظلم پر خاموش نہیں رہیں گے۔

مزید پڑھیں:امریکہ اور اسرائیل کا حساب، ایران نے کھیل کا رخ موڑا

انہوں نے ایران اور غزہ کے شہریوں کے ساتھ اظہار یکجہتی کرتے ہوئے عالمی برادری سے مطالبہ کیا کہ انسانیت اور انصاف کی خاطر آواز بلند کی جائے اور اسرائیلی قیادت کو جنگی جرائم کا ذمہ دار ٹھہرایا جائے۔