ایران امریکہ جوہری مذاکرات کا مستقبل

سچ خبریں:ایران اور امریکہ کے درمیان جاری جوہری مذاکرات عالمی سطح پر توجہ کا مرکز بنے ہوئے ہیں، کیونکہ ان کے ممکنہ نتائج خطے اور دنیا بھر میں امن و استحکام پر گہرے اثرات مرتب کر سکتے ہیں۔

عراقی سیاسی تجزیہ کار اور مبصر نجاح محمد علی نے ایک خصوصی تجزیہ کیا ہے جس میں لکھا ہے کہ جوہری مذاکرات کے مستقبل کا اندازہ امریکی اور علاقائی انٹیلیجنس رپورٹس، خلیج تعاون کونسل (GCC) کے ممالک کی پوزیشنز، خصوصاً سعودی عرب، اور عراق کے کردار کی بنیاد پر لگایا جا سکتا ہے۔

یہ بھی پڑھیں:ایران نے امریکہ کو بالواسطہ مذاکرات کی تجویز کیوں دی؟

اس وقت جبکہ خطہ یمن پر جاری حملوں اور انصاراللہ و صنعا کی حکومت پر ممکنہ زمینی حملوں جیسے واقعات کی لپیٹ میں ہے، اور جب علاقائی قوتیں زیادہ سرگرم کردار ادا کر رہی ہیں، ایسے حالات میں ایران-امریکہ مذاکرات کئی پیچیدہ چیلنجز سے دوچار ہیں۔ تاہم، ان مذاکرات کے نتیجے میں ایسے نئے منظرنامے بھی جنم لے سکتے ہیں جو تزویراتی مفادات اور دباؤ کے درمیان توازن پیدا کر سکتے ہیں۔

ایرانی جوہری مسئلے کے پرامن حل کے امکانات پر مبنی رپورٹوں کے پس منظر میں، خلیجی ممالک — سعودی عرب، امارات، قطر، بحرین، کویت اور عمان — نے مشروط حمایت کا اعلان کیا ہے، جس کی بنیاد سیکیورٹی اور اقتصادی ضمانتوں پر رکھی گئی ہے۔

قابلِ ذکر بات یہ ہے کہ سعودی عرب، امارات اور قطر نے اسرائیل کو اپنی فضائی حدود ایران پر حملے کے لیے استعمال کرنے کی اجازت دینے سے انکار کر دیا ہے، جو ان ممالک کی ایران سے براہ راست تصادم سے گریز کی پالیسی کی عکاسی کرتا ہے۔

اس کی بنیادی وجہ ان ممالک کا اقتصادی انحصار ہے، خاص طور پر تیل کی منڈیوں اور اہم انفراسٹرکچر کی حفاظت، جو کسی بھی فوجی کشیدگی کی صورت میں ایران یا اس کے حلیفوں، مثلاً انصاراللہ، کے نشانے پر آ سکتے ہیں۔

سعودی عرب نے جوہری مذاکرات کی حمایت کرتے ہوئے واضح کیا ہے کہ وہ علاقائی و عالمی تنازعات کے حل کے لیے سفارتی کوششوں کا حامی ہے،چین کی ثالثی سے 2023 میں ایران سے تعلقات کی بحالی کے بعد سعودی موقف میں یہ تبدیلی ایک نمایاں پیش رفت سمجھی جا رہی ہے۔

17 اپریل 2025 کو سعودی وزیر دفاع، شہزادہ خالد بن سلمان کا تہران کا دورہ گزشتہ کئی دہائیوں میں اعلیٰ ترین سطح کی علامتی اور عملی پیش رفت تھی، جس کا مقصد باہمی مذاکرات کو فروغ دینا اور علاقائی استحکام کی حمایت کرنا تھا۔

اس دورے کے دوران شہزادہ خالد نے ایرانی مسلح افواج کے چیف آف اسٹاف، جنرل محمد باقری سے ملاقات کی اور سعودی فرمانروا شاہ سلمان کا پیغام رہبر انقلاب آیت‌الله سید علی خامنه‌ای کو پیش کیا،مذاکرات میں دفاعی تعلقات، علاقائی تعاون، امن و استحکام، اور دہشت گردی کے خلاف جدوجہد جیسے اہم امور زیر بحث آئے۔

عراق، جو ایران اور امریکہ دونوں سے قریبی تعلقات رکھتا ہے، ان مذاکرات کی کامیابی کو اپنے لیے بھی مفید سمجھتا ہے۔ عراق، جو ماضی میں سعودی-ایرانی اور 2015 کے مذاکرات کا میزبان رہا ہے، اب ایک غیر جانب دار علاقائی کھلاڑی کے طور پر اپنی سفارتی حیثیت کو مزید مستحکم کرنا چاہتا ہے۔

1. ایران پر سے پابندیاں ہٹنے کی صورت میں دوطرفہ تجارت، خصوصاً توانائی اور اشیاء کے شعبے میں اضافہ۔

2. کشیدگی میں کمی سے امریکی فوجی موجودگی کے باوجود عسکری خطرات میں کمی۔

3. علاقائی استحکام کے نتیجے میں تعمیر نو اور سرمایہ کاری کے لیے بہتر مواقع۔

امریکی انٹیلیجنس رپورٹس، خصوصاً آکسیوس کی رپورٹوں کے مطابق، ٹرمپ دور حکومت میں ایران کے بارے میں پالیسی سازی میں شدید اختلافات تھے: ایک گروہ فوجی کارروائیوں کا حامی، دوسرا سفارتکاری کا داعی تھا۔ اسرائیلی انٹیلیجنس نے اکتوبر 2024 میں ایران پر حملے کی تیاریوں کی خبر دی، جس نے مذاکرات کو مزید حساس بنا دیا۔ ایران نے محدود لچک دکھائی ہے، جیسے یورینیم ذخائر کو روس منتقل کرنے پر بات، مگر ایٹمی ایندھن کے سائیکل تک رسائی سے پیچھے ہٹنے پر آمادہ نہیں۔

1. جامع معاہدہ: سخت پابندیوں کے بدلے پابندیوں کا بتدریج خاتمہ — موجودہ حالات میں یہ ممکن ہے۔

2. مذاکرات کی ناکامی: امریکہ کی ناقابل قبول شرائط کی بنا پر — جو ایران کو ایٹمی پروگرام تیز کرنے پر مجبور کر سکتی ہے۔

3. عارضی معاہدہ: یورینیم کی منتقلی یا افزودگی میں کمی جیسے جزوی اقدامات — فی الحال سب سے قابل عمل راستہ۔

اگرچہ ایران-امریکہ جوہری مذاکرات شدید پیچیدگیوں سے بھرپور ہیں، لیکن سعودی عرب کی قیادت میں عرب ممالک کی مشروط حمایت اور عراق کے معاون سفارتی کردار نے ان کے کامیاب ہونے کے امکانات کو بڑھا دیا ہے۔

سعودی عرب علاقائی استحکام کے ذریعے اپنے اقتصادی مفادات کا تحفظ اور سفارتی اثرورسوخ کو مضبوط بنانے کا خواہاں ہے، جبکہ عراق مذاکرات کی کامیابی سے استحکام، سرمایہ کاری اور تجارت کے دروازے کھلتے دیکھ رہا ہے۔

مزید پڑھیں:ایران امریکہ مذاکرات؛ 4 چیزوں پر ٹرمپ کا اتفاق

معلوماتی شواہد سے یہ واضح ہے کہ جامع معاہدے کا راستہ کٹھن ضرور ہے لیکن ممکن بھی۔ موجودہ حالات میں سفارتی مذاکرات ہی وہ بہترین حل ہیں جو خطے کو ایک اور تباہ کن جنگ سے بچا سکتے ہیں۔