لبنان اور صہیونی حکومت کے معاہدے کی سلامتی سے متعلق شقوں کی خفیہ دستاویز افشا

?️ 30 جون 2026

سچ خبریں:لبنانی اخبار نے لبنان اور صہیونی حکومت کے درمیان فریم ورک معاہدے کے سلامتی سے متعلق خفیہ ضمیمے کی تفصیلات افشا کر دیں۔

لبنانی روزنامے نے لبنان اور صہیونی حکومت کے درمیان فریم ورک معاہدے کے خفیہ سلامتی ضمیمے کی تفصیلات شائع کر دیں۔ رپورٹ میں حزب اللہ کو غیر مسلح کرنے، لبنانی فوج کے کردار، جنوبی لبنان میں مرحلہ وار کارروائی، امریکی تجاویز اور نگرانی کے طریقہ کار سے متعلق اہم نکات شامل ہیں۔

لبنان کے روزنامہ الاخبار نے اعلان کیا ہے کہ اسے متعدد سفارتی ذرائع کے ذریعے لبنان اور صہیونی حکومت کے درمیان فریم ورک معاہدے کے سلامتی ضمیمے کا متن حاصل ہوا ہے۔

اخبار نے واضح کیا کہ افشا ہونے والی دستاویز میں صرف عمومی فریم ورک شامل ہے، جبکہ اس کی عملی شقیں اور نفاذ سے متعلق تفصیلات ابھی منظر عام پر نہیں آئیں۔ ایک باخبر ذریعے نے الاخبار کو بتایا کہ صہیونی فریق نے سلامتی ضمیمے کی ہر شق کے بارے میں مفصل تجاویز پیش کی ہیں، خاص طور پر وہ تجاویز جو لبنانی فوج کے کردار اور اس کے عملی طریقۂ کار سے متعلق ہیں۔

اس ذریعے نے مزید بتایا کہ امریکی فریق نے بھی لبنانی فوج کے حوالے سے اضافی تجاویز پیش کی ہیں، جن میں ایسے خیالات بھی شامل ہیں جو عمومی فریم ورک کا حصہ بنائے گئے ہیں، تاہم وہ درحقیقت حزب اللہ کو غیر مسلح کرنے کے لیے خصوصی فورس تشکیل دینے کے سابقہ منصوبے کو دوبارہ زندہ کرتے ہیں۔

افشا ہونے والے تازہ ترین متن کے مطابق سلامتی ضمیمہ درج ذیل نکات پر مشتمل ہے:

1: آزمائشی علاقوں کا تعین

دونوں فریق فوری طور پر اس بات کے پابند ہوں گے کہ دریائے لیطانی کے جنوبی علاقے میں پہلے آزمائشی علاقے کا تعین اور آغاز ایک متفقہ فوجی منصوبے کے تحت کیا جائے، جو چار مرحلوں پر مشتمل نمونے کے مطابق عمل کرے گا۔

1۔ علاقے کو مکمل طور پر صاف کیا جائے گا، تمام غیر سرکاری مسلح افراد کے خلاف قانونی کارروائی کی جائے گی جو غیر مجاز سرگرمیوں میں ملوث ہوں، ان کے ڈھانچے، ہتھیاروں کے ذخائر، سرنگوں اور غیر سرکاری مسلح گروہوں کے کمان مراکز کو تباہ یا غیر مؤثر بنایا جائے گا۔

2۔ دونوں فریقوں کے متفقہ تیسرے فریق کی جانب سے اس امر کی تصدیق کی جائے گی کہ علاقہ غیر سرکاری مسلح گروہوں اور ان کے فوجی ڈھانچوں سے مکمل طور پر خالی ہے۔

3۔اعلیٰ صلاحیت رکھنے والی لبنانی مسلح افواج تعینات کی جائیں گی جو مکمل عملی کنٹرول سنبھالیں گی تاکہ غیر سرکاری مسلح گروہوں کی کسی بھی قسم کی دوبارہ سرگرمی کو روکا جا سکے۔

4۔ حکومت لبنان بین الاقوامی امداد کی حمایت اور سیاسی راستے کے ذریعے ہم آہنگی کے ساتھ تعمیر نو کی کوششوں کی قیادت کرے گی۔

2 نفاذ اور تصدیق

لبنانی فوج اس نمونے کے نفاذ کی ذمہ دار ہوگی اور اس کی کامیابی کا اندازہ اس بات سے لگایا جائے گا کہ مذاکرات کے دائرے میں طے شدہ اور قابل تصدیق غیر مسلح کرنے اور تحلیل کے عمل میں کس حد تک کامیابی حاصل ہوئی ہے۔ صہیونی حکومت اور لبنان مشترکہ طور پر لبنان فوجی رابطہ ٹیم تشکیل دیں گے، جو چوبیس گھنٹے تصادم کی روک تھام، تصدیق اور معاہدے کے مکمل نفاذ کی نگرانی کی ذمہ دار ہوگی۔ یہ ٹیم بالواسطہ فوجی ذرائع کے ذریعے اپنی رپورٹیں لبنان اور اسرائیل کے سیاسی حکام کو پیش کرے گی، جبکہ سرگرمیوں کی تصدیق کا عمل صفائی کی کارروائیوں کے ساتھ ساتھ جاری رہے گا۔

3: سلامتی سے متعلق ذمہ داریاں

لبنانی فوج اس بات کی پابند ہوگی کہ وہ حزب اللہ اور دیگر غیر سرکاری مسلح گروہوں کو غیر مسلح کرنے، لبنان کی سرزمین کے اندر ان کے ہر قسم کے فوجی کردار یا عسکری صلاحیت کا خاتمہ کرنے کے لیے تمام ضروری عملی اقدامات کرے۔

4: مرحلہ وار دوبارہ تعیناتی

غیر مسلح کرنے اور تحلیل کے طے شدہ اور قابل تصدیق عمل کی تکمیل تک صہیونی حکومت اس بات کی پابند ہوگی کہ وہ مخصوص شرائط کے تحت لبنان کی سرزمین سے اپنی افواج کی مرحلہ وار کمی کرے۔ یہ عمل لبنان فوجی رابطہ ٹیم کے ذریعے طے شدہ منصوبے اور ترتیب کے مطابق انجام پائے گا اور اس کے ساتھ ہی لبنانی فوج کی تعیناتی بھی کی جائے گی۔

5: مطلوبہ نتیجہ

فریم ورک معاہدے کے تحت تمام غیر سرکاری مسلح گروہوں کو غیر مسلح کرنے اور تحلیل کرنے کی وسیع تر کوششوں کے دائرے میں حکومت لبنان کو اپنی تمام سرزمین پر مکمل خودمختاری بحال کرنا ہوگی اور صہیونی حکومت کی طویل مدتی سلامتی کو یقینی بنانا ہوگا۔

6: نگرانی اور اختلافات کا تصفیہ

دونوں فریق امریکہ کی موجودگی میں کیے گئے اقدامات کا باقاعدہ جائزہ لیتے رہیں گے اور باہمی اتفاق سے اس ضمیمے میں ترمیم بھی کر سکیں گے۔ اس ضمیمے کی تشریح یا نفاذ سے متعلق کسی بھی اختلاف کو سہ فریقی مذاکرات کے ذریعے حل کیا جائے گا۔