روس کا سومی پر حملہ؛ یوکرین بحران پر امریکہ-نیٹو میں بڑھتی خلیج اور کریملن کی برتری

سچ خبریں:ماسکو-واشنگٹن مذاکرات کے درمیان سومی پر روسی حملہ سفارتی منظرنامے میں نئی تبدیلیوں کا پیغام دیتا ہے۔

یوکرین بحران کے سفارتی حل کے لیے جاری واشنگٹن اور ماسکو کی غیر رسمی بات چیت کے درمیان، روس کی جانب سے شمال مشرقی یوکرین کے شہر سومی پر ایک مہلک میزائل حملے نے نیٹو اور امریکہ کے درمیان اسٹریٹجک اختلافات کو مزید گہرا کر دیا، جب کہ میدان جنگ میں روس کی پوزیشن کو مزید مضبوطی ملی ہے۔

یہ بھی پڑھیں:یوکرین جنگ کےعالمی نظام پر سیاسی اثرات

یہ حملہ تقریباً ایک ہفتہ قبل، 13 اپریل کو سومی شہر میں ہوا، جسے جنگ کے آغاز سے اب تک کا سب سے جان لیوا حملہ قرار دیا جا رہا ہے،مقامی و بین الاقوامی ذرائع ابلاغ کے مطابق، اس حملے میں 30 سے زائد افراد جان سے گئے، جن میں یوکرینی فوج کی 27ویں آرٹلری بریگیڈ کے کمانڈر یوری یولا بھی شامل تھے، جب کہ 100 سے زائد افراد زخمی ہوئے۔

یہ حملہ صبح 10:20 کے قریب سومی اسٹیٹ یونیورسٹی اور اس کے کانفرنس ہال پر کیا گیا، جہاں یوکرینی علاقائی دفاعی فورس کی 117ویں بریگیڈ کو اعزازات دینے کی ایک سرکاری تقریب ہونی تھی۔ اسی تقریب کے سبب بعد میں سومی کے گورنر ولودیمیر آرتیوخ کو برطرف کر دیا گیا، کیونکہ شہری آبادی والے علاقے میں فوجی تقریب منعقد کرنا خطرناک قرار دیا گیا۔

یہ حملہ ایسے وقت میں ہوا جب امریکہ، روس اور کچھ یورپی ممالک کے درمیان غیر رسمی سطح پر امن مذاکرات کی فضا بن رہی تھی۔ ماہرین کا کہنا ہے کہ روس نے اس حملے کے ذریعے یہ پیغام دیا کہ وہ صرف اسی صورت میں مذاکرات میں شامل ہوگا جب اسے میدان جنگ میں بالا دستی حاصل ہو، اور یہ کہ کییف میں ہونے والے اہم عسکری اجلاس بھی ماسکو کی پہنچ سے دور نہیں۔

سومی پر روسی حملے نے عالمی سطح پر شدید ردعمل کو جنم دیا، مگر نیٹو اور امریکہ کے مؤقف میں واضح تضاد سامنے آیا۔ نیٹو نے فوری طور پر اس حملے کو جنگی جرم قرار دیتے ہوئے سخت مذمت کی۔ نیٹو کے سیکریٹری جنرل مارک روٹے نے بندرگاہی شہر اوڈیسا میں موجودگی کے دوران کہا:

نیٹو یوکرین کی ارضی سالمیت کی غیر مشروط حمایت کرتا ہے اور محض بیانات ہی نہیں بلکہ عملی طور پر یوکرین کے ساتھ کھڑا ہے۔

اس کے برعکس، امریکہ کا ردعمل خاصا محتاط رہا۔ واشنگٹن، جو جنگ کے خاتمے کے لیے ایک منصوبہ تیار کر رہا ہے، نے سومی حملے کی مذمت میں جی-7 کے مشترکہ اعلامیے پر دستخط کرنے سے گریز کیا۔

سفارتی ذرائع کے مطابق، ٹرمپ انتظامیہ کی خارجہ پالیسی ٹیم کا ماننا ہے کہ اس مرحلے پر روس کے خلاف سخت بیانات، ماسکو کے ساتھ براہ راست مذاکرات کا موقع ضائع کر سکتے ہیں۔ واشنگٹن کے اس رویے نے نہ صرف کییف کو تشویش میں مبتلا کیا بلکہ جی-7 کے بعض ارکان نے بھی اسے امریکہ کی سیکیورٹی ذمہ داریوں سے پسپائی قرار دیا۔

اب تک امریکہ اور روس کے درمیان تین ادوار میں مذاکرات ہو چکے ہیں: دو بار ریاض میں اور ایک بار استنبول میں۔ پہلا اجلاس گزشتہ سال کے اختتام پر امریکی وزیر خارجہ مارکو روبیو اور ان کے روسی ہم منصب سرگئی لاوروف کے درمیان ہوا تھا۔

1. واشنگٹن اور ماسکو میں سفارتخانوں کی مکمل بحالی اور ان کی مکمل سفارتی سرگرمیوں کی بحالی۔

2. یوکرین جنگ کے تمام فریقوں کے لیے قابل قبول، پائیدار حل کی تلاش کے لیے اعلیٰ سطحی ٹیم کی تشکیل۔

3. امریکہ اور روس کے درمیان جیوپولیٹیکل اور اقتصادی تعاون کی راہ ہموار کرنا، بشرطیکہ یوکرین جنگ ختم ہو۔

4. مذاکرات کے تسلسل پر فریقین کی مکمل آمادگی اور اس عمل کو آگے بڑھانے کے عزم کا اظہار۔

یہ صورتحال ظاہر کرتی ہے کہ امریکہ، یوکرین بحران کے حل کے لیے جنگی بیانیے سے ہٹ کر مذاکرات کی راہ اختیار کرنے کا خواہاں ہے، جب کہ نیٹو روس کے خلاف سخت مؤقف اختیار کیے ہوئے ہے۔

دور جدید مذاکرات واشنگٹن-ماسکو: سومی حملے کے بعد بحر اسود، توانائی تنصیبات، اور مشروط فائر بندی پر گفتگو

حالیہ دنوں ریاض کے رِٹز کارلٹن ہوٹل میں، چار اپریل بروز پیر، امریکہ اور روس کے درمیان دوسرے دور کی بند کمرہ ملاقات کے بعد دونوں فریقین نے اپنے مؤقف کا اعلان کیا۔ اس اجلاس میں کئی اہم معاملات زیر بحث آئے جنہوں نے یوکرین جنگ کے ممکنہ خاتمے کی سمت میں نئی راہیں کھولی ہیں۔

وائٹ ہاؤس کے مطابق، ریاض اجلاس کا مرکز بحر اسود کی صورتحال اور یوکرین و روس کی توانائی تنصیبات پر حملوں کی بندش تھا، جیسا کہ امریکی صدر ڈونلڈ ٹرمپ نے تجویز دیا تھا۔ امریکی بیان کے مطابق، واشنگٹن نے روس کو زرعی مصنوعات اور کھادوں کی عالمی منڈی تک رسائی بحال کرنے، سمندری انشورنس لاگت کم کرنے، اور بندرگاہوں و ادائیگی نظام تک سہولت فراہم کرنے میں تعاون کی یقین دہانی کروائی۔

بیان میں مزید کہا گیا کہ واشنگٹن اور ماسکو دونوں مستقل اور پائیدار امن کے لیے کام کرنے پر متفق ہیں تاکہ یوکرین جنگ کا اختتام ممکن ہو۔

دوسری جانب، کریملن کے ترجمان دیمتری پسکوف نے تصدیق کی کہ 30 دن کے لیے بعض پابندیاں عارضی طور پر معطل کی گئی ہیں، جنہیں باہمی رضامندی سے بڑھایا جا سکتا ہے۔ پسکوف کے مطابق، کسی ایک فریق کی جانب سے فائر بندی کی خلاف ورزی کی صورت میں دوسرا فریق معاہدے سے الگ ہو سکتا ہے۔ ساتھ ہی، روس اور امریکہ نے ان بنیادی تنصیبات کی فہرست پر بھی اتفاق کیا ہے جو اس جنگ بندی معاہدے میں شامل ہوں گی۔

روس-امریکہ مذاکرات کا تیسرا دور حال ہی میں 21 اپریل کو ترکی کے شہر استنبول میں منعقد ہوا۔ 6 گھنٹے طویل بات چیت میں دونوں ممالک نے روسی سفارتی املاک کی واپسی، ویزہ جاری کرنے کے عمل کو آسان بنانے، سفارتکاروں کی نقل و حرکت کے قواعد، اور بینکنگ خدمات پر ایک نئے اجلاس کے انعقاد پر اتفاق کیا۔

یہ سب ایسے وقت میں ہو رہا ہے جب امریکہ، روس کے ساتھ خفیہ مذاکرات کے ذریعے ممکنہ جنگ بندی معاہدے کی بنیاد رکھ رہا ہے۔ ذرائع کے مطابق، ان مذاکرات کا ایک متنازعہ نکتہ مشرقی یوکرین کے کچھ علاقوں کو روس کے حوالے کرنے کا امکان ہے۔ اس کے ساتھ ساتھ، یوکرین کو نیٹو میں شامل نہ کرنے کی شق بھی امریکی مسودہ معاہدے میں شامل کی گئی ہے—جو کہ روس کی دیرینہ سرخ لکیر ہے۔

یوکرین کے صدر ولودیمیر زلنسکی نے تاہم دو ٹوک الفاظ میں کہا ہے کہ وہ کسی بھی ایسے معاہدے کو قبول نہیں کریں گے جو یوکرین کی سرزمین کے نقصان کا باعث بنے۔

ڈونلڈ ٹرمپ کے دوبارہ صدر بننے اور امن مذاکرات کے آغاز کے بعد، میدان جنگ میں روس کا پلڑا بھاری ہوتا دکھائی دے رہا ہے۔ امریکہ کی جانب سے فوجی و مالی امداد میں کمی اور مذاکرات پر توجہ مرکوز کرنے سے روس کو مشرقی و جنوبی یوکرین میں پیش رفت حاصل ہوئی ہے۔

تجزیہ کاروں کا کہنا ہے کہ واشنگٹن کی نئی پالیسی، جس کا مقصد جنگ کا سفارتی حل تلاش کرنا ہے، یوکرین کو جدید ہتھیاروں کی فراہمی میں رکاوٹ بن رہی ہے۔ اس کے نتیجے میں یوکرینی افواج کئی محاذوں پر کمزور پڑ رہی ہیں، جہاں نہ صرف ہتھیاروں کی قلت بلکہ طویل جنگ کی تھکن سے بھی ان کا مورال متاثر ہو رہا ہے۔

روس نے حالیہ ہفتوں میں یوکرین کے اہم اسٹریٹیجک علاقوں جیسے دونباس، زاپوریژیا اور خرسون میں اپنی عسکری کارروائیوں کو تیز کر دیا ہے۔ ان حملوں کے نتیجے میں ماسکو نے کئی علاقوں پر کنٹرول حاصل کیا ہے یا اپنے قبضے کو مستحکم کیا ہے۔ روسی فوج نے نہ صرف اپنی تعداد بڑھائی ہے بلکہ نئے جنگی حربے اپناتے ہوئے یوکرین کے دفاعی محاذوں پر دباؤ میں اضافہ کر دیا ہے۔

ان حالات میں امن مذاکرات کے امکانات بھی روشن ہوتے دکھائی دے رہے ہیں۔ امریکی صدر ڈونلڈ ٹرمپ کی دوسری مدت صدارت میں، خارجہ پالیسی کو محدود کر کے داخلی مسائل پر توجہ دینے کی پالیسی کے تحت، روس کے ساتھ ایسے معاہدے کی کوشش کی جا رہی ہے جس میں کچھ رعایتیں دی جا سکتی ہیں۔ تاہم، اس نقطہ نظر نے یوکرین کے یورپی اتحادیوں اور خود کییف میں حکام کو شدید تشویش میں مبتلا کر دیا ہے۔ ان کے خیال میں عالمی حمایت میں ممکنہ کمی یوکرین کی علاقائی سالمیت اور جنگ کے طویل المدت اثرات پر منفی اثر ڈال سکتی ہے۔

روس کا سومی پر مہلک حملہ، اور اس کے بعد امریکہ و نیٹو کے درمیان ردعمل میں اختلاف، مغربی اتحاد میں دراڑ اور یوکرین جنگ کے منظرنامے میں ایک اہم موڑ کو ظاہر کرتا ہے۔ جہاں نیٹو یوکرین کی مکمل حمایت پر قائم ہے، وہیں امریکہ اب جنگ کے خاتمے کے لیے روس سے سمجھوتے پر آمادہ دکھائی دیتا ہے۔

یہ صرف بیانات میں فرق نہیں بلکہ دو بالکل مختلف حکمت عملیوں کی عکاسی ہے: ایک طرف غیر مشروط حمایت اور دوسری طرف حقیقت پسندی کی بنیاد پر جنگ کے خاتمے کی کوشش۔ اس تضاد نے مغربی بلاک کے اندر ایک گہری بحث کو جنم دیا ہے کہ اس جنگ کی قیمت، مقاصد، اور اس کے لیے درکار قربانیاں کس حد تک قابل قبول ہیں۔

مزید پڑھیں:یوکرین کی جنگ کے تیسرے سال میں میدان جنگ، نقصانات اور اقتصادی اثرات کا جائزہ

روس، امریکہ کی اندرونی سیاسی تبدیلیوں اور ٹرمپ کی خارجہ پالیسی میں تبدیلی کا بغور مشاہدہ کرتے ہوئے، نہ صرف میدان جنگ میں اپنی پوزیشن مضبوط کر رہا ہے بلکہ سفارتی میز پر بھی بہتر سودے بازی کی پوزیشن میں آ چکا ہے۔ جنگی کامیابیاں اور مغرب کی غیر یقینی کیفیت، ماسکو کو ایک حقیقت پسندانہ معاہدے کی جانب لے جا سکتی ہیں، جو اسے نمایاں فوائد دلوا سکتی ہے۔