کوئی ڈراما یا فلم ایک جیسی نہیں، فیصل قریشی نے سوال کرنے والی لڑکی کو جھاڑ پلادی

?️ 10 جون 2025

کراچی: (سچ خبریں) اداکار فیصل قریشی نے ایک جیسے ڈرامے یا فلمیں بنائے جانے کا شکوہ کرنے والی لڑکی کو جھاڑ پلاتے ہوئے کہا ہے کہ پاکستان میں کوئی بھی ڈراما یا فلم ایک جیسی نہیں۔

فیصل قریشی حال ہی میں سونیا حسین اور ثمینہ پیرزادہ کے ساتھ ’ہنسنا منع ہے‘ پروگرام میں شریک ہوئے، جہاں ان سے ایک لڑکی نے سوال کیا کہ تمام ڈرامے اور فلمیں ایک جیسی بن رہی ہیں، کیا ان کی نئی فلم ’دیمک‘ مختلف ہے؟

اس سوال پر فیصل قریشی نے سوال کرنے والی لڑکی سے کہا کہ وہ ایک جیسی کہانی پر مبنی چند ڈراموں کے نام بتائیں؟

اداکار کے سوال پر لڑکی کسی بھی ڈرامے کا نام لینے سے قاصر رہیں، تاہم انہوں نے کہا کہ تقریبا تمام ڈرامے ساس اور بہو جیسی کہانیوں کے گرد بنائے جاتے ہیں۔

لڑکی کی بات پر فیصل قریشی نے کہا کہ گزشتہ تین سال سے ساس اور بہو کے قصوں پر ڈرامے نہیں بن رہے۔

فیصل قریشی نے کہا کہ یہ تاثر اور بات غلط ہے کہ تمام ڈرامے ایک جیسے ہی ہیں، ایسا بالکل بھی نہیں، تمام ڈرامے مختلف ہیں۔

اداکار نے کہا کہ ’عشق مرشد الگ تھا، دنیا پور الگ ہے، کابلی پلاؤ کی کہانی دوسری تھی اور اب ان کے نشر ہونے والے ڈرامے بہروپیا‘ کی کہانی مختلف ہے، کوئی بھی ڈراما ایک جیسا نہیں۔

اداکار کے مطابق گزشتہ کچھ عرصے سے بننے والے تمام ڈرامے مختلف ہیں، کوئی بھی ایک جیسا نہیں۔

ساتھ ہی انہوں نے کہا کہ اسی طرح تمام فلمیں بھی مختلف ہیں، کسی فلم کی کہانی ایک جیسی نہیں ہوتی۔

اداکار نے بتایا کہ ہمایوں سعید کی فلم الگ ہوتی ہے، فہد مصطفیٰ کی فلم کی کہانی دوسری ہوتی ہے اور اب ان کی ریلیز ہونے والی فلم ’دیمک‘ کی کہانی مختلف ہے۔

فیصل قریشی نے ہمایوں سعید کی پرانی فلموں ’جوانی پھر نہیں آنی، پنجاب نہیں جاؤں گی‘ کے نام بھی لیے اور کہا کہ تمام فلمیں مختلف تھیں، کوئی بھی ایک جیسی نہیں تھی۔

فیصل قریشی ڈراموں اور فلموں کے مختلف ہونے پر بات کرتے وقت قدرے جذباتی نظر آئے اور انہوں نے سوال کرنے والی اور طعنہ دینے والی لڑکی کو کھری کھری سنادیں۔