کمال راشد  نے بھارتی کرکٹ ٹیم کو کیا  مشورہ دیا؟

?️ 1 نومبر 2021

ممبئی (سچ خبریں) بالی ووڈ اداکار اور فلمی ناقد کمال راشد خان المعروف کے آر کے نے کیویز کے ہاتھوں عبرتناک شکست کے بعد اپنی کرکٹ ٹیم کو ایک مفید مشورہ دیتے ہوئے لکھا کہ بھارت پہلے ہی ورلڈکپ سے باہر ہوگیا ہے لہذا اب اسے نیوزی لینڈ کو سیمی فائنل سے باہر کرنے کے لیے جان بوجھ کر باقی کے 3 میچ ہارنے چاہئے۔

کے آر کے نے مائیکرو بلاگنگ ویب سائٹ ٹوئٹر پر بھارت کی اہم میچ میں نیوزی لینڈ سے شکست کے بعد بھارتی کرکٹ ٹیم کو مشورہ دیتے ہوئے لکھا کہ ’ ہندوستان پہلے ہی آئی سی سی ٹی 20 ورلڈ کپ 2021 سے باہر ہوگیا ہے لہٰذا اب بھارت کو نیوزی لینڈ کو سیمی فائنل سے باہر کرنے کے لیے جان بوجھ کر باقی کے 3 میچ ہارنے چاہئے۔

انہوں نے مزید لکھا کہ ’ اس طرح ان تین چھوٹی ٹیموں کو بھی خوشی ملے گی۔ کل رات نیوزی لینڈ نے بھارت کو یکطرفہ مقابلے میں 8 وکٹوں سے شکست دے کر سیمی فائل میں بھارت کے پہنچنے کی امیدوں پر پانی پھیر دیا اور اب بھارت ٹی ٹونٹی ورلڈ کپ سے باہر ہونے کے دہانے پر ہے۔

واضح رہے کہ آئی سی سی مینز ٹی 20 ورلڈکپ 2021 کے سپر 12 مرحلے کے گروپ 2 کے اہم میچ میں نیوزی لینڈ نے بھارت کو یکطرفہ مقابلے کے بعد 8 وکٹوں سے شکست دی۔کیویز نے بھارت کی جانب سے دیا گیا ہدف 15ویں اوور میں 2 وکٹوں کے نقصان پر حاصل کیا۔