میں آج سے ماہرہ خان ہوں، جو کرنا ہے، کرلو، رابعہ کلثوم

?️ 13 مئی 2023

کراچی: (سچ خبریں) اداکارہ رابعہ کلثوم نے پی ٹی آئی کے چیئرمین عمران خان کی گرفتاری اور ان کے حامیوں کی جانب سے ملک بھر میں کیے گئے مظاہروں پر دلچسپ ردعمل دیتے ہوئے کہا ہے کہ وہ آج سے ماہرہ خان ہیں، جس نے جو کرنا ہے، کرلے۔

رابعہ کلثوم نے انسٹاگرام پوسٹ میں لکھا کہ اگر متحدہ قومی موومنٹ (ایم کیو ایم) کو کراچی میں فساد ہونے پر افسوس ہے اور اگر آصف علی زرداری نے بینظیر بھٹو کی شہادت کے دن 27 دسمبر کو امن قائم رکھا ہوا تھا تو وہ بھی آج سے ماہرہ خان ہیں، جس نے جو کرنا ہے، کرلے۔

اداکارہ نے اپنی پوسٹ میں مزید لکھا کہ اگر شریف خاندان منی لانڈرنگ کیس میں بے قصور تھا تو وہ بھی آج سے ماہرہ خان ہیں، جس نے جو کرنا ہے، کرلے۔

اداکارہ نے اپنی پوسٹ میں عمران خان کی گرفتاری اور ان کے حامیوں کی جانب سے مظاہروں کے دوران جلاؤ گھیراؤ کرنے کا ذکر نہیں کیا، تاہم انہوں نے ایک ایسے وقت میں پوسٹ کی جب تحریک انصاف کے چیئرمین کو گرفتار کیے جانے کے بعد ان کے حامیوں نے ملک بھر میں مظاہروں کے دوران توڑ پھوڑ اور تشدد کیا۔

اگرچہ اداکارہ نے واضح طور پر تحریک انصاف اور عمران خان کی حمایت نہیں کی، تاہم انہوں نے انسٹاگرام پر اپنی پروفائل تصویر بھی تبدیل کرتے ہوئے اس پر عمران خان کی تصویر لگالی۔

رابعہ کلثوم نے ایک ایسے وقت میں مذکورہ پوسٹ کی جب عمران خان کو 11 مئی کی شام کو سپریم کورٹ میں پیش کیا گیا، جہاں عدالت نے ان کی گرفتاری غیر قانونی قرار دیتے ہوئے انہیں رہا کرنے کا حکم دیا تھا۔

ساتھ ہی چیف جسٹس نے خواہش ظاہر کی تھی کہ عمران خان اپنی گرفتاری کے بعد ملک بھر میں کی جانے والی توڑ پھوڑ کی مذمت بھی کریں لیکن تحریک انصاف کے چیئرمین نے جلاؤ گھیراؤ کی واضح مذمت نہیں کی۔

بعد ازاں عمران خان کو 12 مئی کو اسلام آباد ہائی کورٹ میں پیش کیا گیا، جہاں عدالت نے ان کی تمام کیسز میں 17 مئی تک ضمانت منظور کرتے ہوئے انہیں رہا کرنے کا حکم دیا۔

خیال رہے کہ تحریک انصاف کے چیئرمین کی 9 مئی کو گرفتاری کے فوراً بعد ملک بھر میں پارٹی کارکنوں کی جانب سے ہنگامہ آرائی کی گئی، فوج کی املاک اور تنصیبات پر حملہ کیا گیا، سرکاری عمارتوں میں آگ بھی لگائی گئی، اس دوران 8 افراد جاں بحق اور 290 زخمی ہوئے تھے۔

ملک میں افراتفری جیسی صورتحال کو دیکھتے ہوئے شوبز شخصیات نے افسوس کا اظہار کیا اور عمران خان کو گرفتار کرنے پر سیخ پا دکھائی دیے۔