او آئی سی کے اجلاس میں پاکستان کی نمائندگی کون کر رہے ہیں؟

?️ 6 اگست 2024

سچ خبریں: نائب وزیرِ اعظم اور وزیر خارجہ اسحاق ڈار او آئی سی وزرائے خارجہ ایگزیکٹو کمیٹی کے غیر معمولی اجلاس میں شرکت کرنے کے لیے آج شام سعودی عرب روانہ ہوں گے۔

ذرائع کے مطابق او آئی سی وزرائے خارجہ ایگزیکٹو کمیٹی کا غیرمعمولی اجلاس کل شام جدہ میں منعقد ہوگا، جس کا ایجنڈا دو نکاتی ہے۔

یہ بھی پڑھیں: او آئی سی کے وزرائے خارجہ کا ہنگامی اجلاس طلب

ترجمان دفتر خارجہ ممتاز زہرا بلوچ نے بتایا کہ یہ اجلاس اسلامی جمہوری ایران اور فلسطین کی درخواست پر بلایا جا رہا ہے۔

انہوں نے کہا کہ اجلاس میں فلسطین اور دیگر علاقائی ریاستوں کے خلاف اسرائیلی جارحیت پر تبادلہ خیال ہوگا۔

واضح رہے کہ فلسطینی کاز کے لیے پاکستان ہمیشہ بین الاقوامی فورمز پر آواز بلند کرنے میں پیش پیش رہا ہے۔

ممتاز زہرا بلوچ نے مزید بتایا کہ اسحاق ڈار غزہ اور مشرق وسطیٰ کی ابتر صورتِ حال پر پاکستان کے تحفظات کا اظہار کریں گے۔

انہوں نے کہا کہ ہمارے وزیر خارجہ امن کی فوری ضرورت اور غزہ کے لوگوں کو امداد کی فراہمی پر زور دیں گے۔

مزید پڑھیں: امیر جماعت اسلامی سراج الحق کا او آئی سی سے بڑا مطالبہ

سفارتی ذرائع کے مطابق ایجنڈے کا پہلا نکتہ فلسطینی عوام کے خلاف قابض اسرائیل کے جرائم کا تسلسل ہے جبکہ دوسرا نکتہ قابض اسرائیل کی ایران کی سالمیت کے خلاف جارحیت ہے۔