ملک کی سیاسی صورتحال کہاں جا رہی ہے اور فائدہ کیسے ہو رہا ہے؛ شیخ رشید کی زبانی

?️ 26 جولائی 2024

سچ خبریں: عوامی مسلم لیگ کے سربراہ شیخ رشید نے کہا ہے کہ ملک کی سیاسی صورتحال تباہی کی طرف بڑھ رہی ہے، جس کا فائدہ بانی پی ٹی آئی کو ہو رہا ہے۔

اسلام آباد میں میڈیا سے گفتگو کرتے ہوئے شیخ رشید نے بتایا کہ لال حویلی ہماری ملکیت ہے اور ہائی کورٹ نے ہمارے حق میں فیصلہ دیا ہے۔ مجھے نوٹس ملا ہے کہ میں سیکریٹری مذہبی امور کے پاس حاضر ہو جاؤں۔

یہ بھی پڑھیں: امن و امان کی خراب صورتحال، گورنر خیبرپختونخوا نے صوبے میں سیاسی سرگرمیوں کو مشکل قرار دے دیا

شیخ رشید نے مزید کہا کہ یہ سماعت آج ملتوی نہیں ہو سکتی، ساڑھے 9 بجے بلایا گیا لیکن سیکریٹری مذہبی امور موجود نہیں تھے۔ سمجھ نہیں آ رہی کہ انہوں نے کیوں نوٹس دیا، اب ہمیں دوبارہ ہائی کورٹ جانا پڑے گا۔

انہوں نے کہا کہ لال حویلی میرے بھائی کے نام ہے اور میری وہاں رہائش ہے۔ بھارتی فلمساز مہیش بھٹ نے دو بار لال حویلی پر فلم بنانے کی درخواست کی، لیکن میں نے اجازت نہیں دی۔

سابق وفاقی وزیر نے کہا کہ جب کسی کی عقل پر پردے پڑ جاتے ہیں تو پھر ایسے ہی ہوتا ہے۔ یہ لوگ پی ٹی آئی پر پابندی لگانا چاہتے تھے، 31 اگست تک ملک کی سیاست کا حال واضح ہو جائے گا۔

عوامی مسلم لیگ کے سربراہ نے کہا کہ قوم بجلی کے بلوں سے پریشان ہے، بھائی بھائی کو مار رہا ہے۔ میں دو بڑوں کو کہتا ہوں کہ ان کو فارغ کریں، حکومت نفرت کا نشان بن چکی ہے اور نالائق ہے۔

شیخ رشید نے کہا کہ عدالتیں اس بار انہیں روند دیں گی۔ عدلیہ سے آہنی ہاتھوں سے نمٹنے کی باتیں کریں گے تو کیا ہوگا؟ سیاسی لوگ ایک ہی ٹھوس کیس بناتے ہیں جبکہ میرے خلاف 14 کیسز ہیں۔

مزید پڑھیں: ملک میں کشیدہ سیاسی صورتحال کے سبب آئی ایم ایف معاہدے میں تاخیر ہورہی ہے

انہوں نے کہا کہ یہ صرف تنگ کرنے کے بہانے ہیں۔ ہائی کورٹ قرار دے چکی ہے کہ ہمارے خلاف کوئی کیس نہیں ہے۔