پیرس اولمپکس ہمیں راس نہیں آیا؛ناکامی پر ناکامی

🗓️ 29 جولائی 2024

سچ خبریں: پیرس اولمپکس میں شوٹنگ مقابلوں کے دوران پاکستانی شوٹرز کشمالہ طلعت اور گلفام جوزف ایک اور ایونٹ میں ناکام ہوگئے۔ دونوں مکس 10 میٹر ایئر پسٹل کے پہلے ہی راؤنڈ سے باہر ہو گئے۔

ڈان نیوز کے مطابق، فرانس کے دارالحکومت میں جاری مقابلے میں کشمالہ طلعت اور گلفام جوزف کا مجموعی اسکور 571 رہا۔ قومی شوٹرز کی جوڑی 17 ٹیموں میں سے 14 ویں پوزیشن پر رہی۔

یہ بھی پڑھیں: پیرس اولمپکس میں گولڈ میڈل لانے کی واحد امید

پہلی کوشش میں پاکستانی شوٹرز نے 189 کا اسکور بنایا، کشمالہ طلعت نے 97 اور گلفام جوزف نے 92 اسکور کیا۔

دوسری باری میں 195 کا اسکور بنایا، کشمالہ طلعت نے 97 اور گلفام جوزف نے 98 اسکور کیا۔

تیسری اور آخری کوشش میں دونوں نے 187 کا اسکور بنایا، کشمالہ طلعت نے 93 اور گلفام جوزف نے 94 اسکور کیا۔

گزشتہ روز بھی پیرس اولمپکس کے دوران پاکستانی شوٹرز نے مایوس کن کارکردگی دکھائی تھی۔

10 میٹر ایئر پسٹل مقابلوں میں قومی شوٹرز فائنل راؤنڈ میں جگہ بنانے میں ناکام رہے تھے۔

مردوں کے مقابلے میں گلفام جوزف 33 میں سے 22 ویں نمبر پر رہے اور ان کا مجموعی اسکور 571 تھا۔ خواتین کے مقابلے میں کشمالہ طلعت 44 میں سے 31 ویں نمبر پر آئیں اور ان کا اسکور 568 رہا۔

اسی طرح، پاکستانی تیراک احمد درانی اور جہاں آرا نبی بھی مایوس کن کارکردگی کے بعد ایونٹ سے باہر ہو گئیں۔

احمد درانی کا 200 میٹر فری اسٹائل سوئمنگ میں وقت ایک منٹ 58 سیکنڈ رہا جو ان کے قومی ریکارڈ ایک منٹ 55 سیکنڈ سے کم تھا۔

وہ 25 کھلاڑیوں میں آخری نمبر پر رہے جبکہ رومانیہ کے ڈیوڈ پوپووجی ایک منٹ 45 سیکنڈ کے ساتھ پہلے نمبر پر رہے۔

مزید پڑھیں: احسن اقبال پاکستان اولمپکس کے سربراہ پر برس پڑے ‘مزید تذلیل قابل قبول نہیں’

جہاں آرا نبی نے 200 میٹر فری اسٹائل سوئمنگ میں دو منٹ 10 سیکنڈ کا وقت لیا اور 30 ایتھلیٹس میں 26 ویں نمبر پر آئیں۔

پاکستان کے دونوں تیراکوں کی طرح، جنوبی ایشیا کے دیگر تمام تیراک بھی وائلڈ کارڈ انٹری کے ذریعے اولمپکس میں شریک ہوئے تھے۔