متعدد افراد کے شناختی کارڈ و پاسپورٹس بلاک کرنے کا حکم؛ وجہ؟

?️ 27 جون 2024

سچ خبریں: انسداد دہشت گردی کی عدالت نے یوٹیوبر عادل راجہ، شاہین صہبائی، معید پیرزادہ، صابر شاکر، حیدر مہدی اور وجاہت ایس خان کی جائیداد ضبط اور شناختی کارڈ بلاک کرنے کا حکم دے دیا ہے۔ ان افراد پر اشتعال انگیزی اور تشدد پر اکسانے کے مقدمات میں اشتہاری قرار دیا گیا تھا۔

اسلام آباد کی انسداد دہشت گردی عدالت نے یہ بڑا حکم جاری کرتے ہوئے ڈپٹی کمشنر اسلام آباد کو ملزمان کی منقولہ اور غیر منقولہ جائیداد قرق کرنے کا حکم دیا ہے۔

یہ بھی پڑھیں:عمران خان، اہم رہنماؤں نے 9 مئی کی ہنگامہ آرائی کی ’منصوبہ بندی‘ کی، جیو فینسنگ میں انکشاف

عدالت نے چیئرمین نادرا کو ملزمان کے شناختی کارڈ اور نائیکوپ بلاک کرنے جبکہ ایف آئی اے کے ڈی جی کو ملزمان کے پاسپورٹ بلاک کرنے کا بھی حکم دیا ہے۔

عدالت نے احکامات پر عملدرآمد کی رپورٹ 15 دن میں طلب کرلی ہے جبکہ ملزمان کے خلاف استغاثہ کے گواہوں کے بیانات بھی قلمبند کرلیے گئے ہیں۔

انسداد دہشتگردی کی عدالت نے دس جولائی تک تمام متعلقہ محکموں کو عملدرآمد رپورٹ جمع کروانے کی ہدایت کی ہے جبکہ جج طاہر عباس سپرا نے تحریری احکامات بھی جاری کردیے ہیں۔

مزید پڑھیں: پولیس، عدالت پر ’مسلح جتھوں کے حملوں‘ کی تحقیقات کیلئے جے آئی ٹی بنانے کا فیصلہ

واضح رہے کہ عادل راجہ، شاہین صہبائی، معید پیرزادہ، صابر شاکر، حیدر مہدی اور وجاہت ایس خان کے خلاف اشتعال انگیزی اور لوگوں کو تشدد پر اکسانے کے الزامات کے تحت مقدمات درج ہیں۔