پاکستانیوں کو امارات جانے میں درپیش مشکلات کے بارے میں یو اے ای قونصل جنرل کا بیان

?️ 6 اگست 2024

سچ خبریں: کراچی میں متحدہ عرب امارات کے قونصل جنرل بخیت عتیق الرومیتی نے واضح کیا ہے کہ پاکستانیوں کے لیے امارات کے ویزوں پر کوئی پابندی نہیں ہے۔

انہوں نے دبئی، ابو ظہبی، اور شارجہ جانے والے پاکستانی شہریوں کو ہدایت کی کہ وہ دوسروں کا سامان لانے اور لے جانے میں سخت احتیاط کریں۔

یہ بھی پڑھیں: متحدہ عرب امارات نے پاکستانیوں کے ویزوں پر کوئی پابندی نہیں لگائی، دفتر خارجہ

متحدہ عرب امارات کے شہروں میں سندھ کے لوگوں کو درپیش ویزا مسائل کے حل کے لیے میئر سکھر اور ترجمان سندھ حکومت ارسلان اسلام شیخ نے اماراتی قونصل جنرل کراچی بخیت عتیق الرومیتی سے ملاقات کی۔

اس موقع پر بات کرتے ہوئے بخیت عتیق الرومیتی نے کہا کہ امارات کے پاکستان کے ساتھ بہترین تعلقات ہیں اور پاکستانی بھائیوں اور بہنوں کو ہر ممکن اور مکمل سہولیات فراہم کی جا رہی ہیں۔

انہوں نے وضاحت کی کہ پاکستانیوں پر کسی قسم کی پابندی نہیں ہے، جسے لوگ پابندی سمجھتے ہیں وہ دراصل چیک اینڈ بیلنس کو مکمل فعال کرنے کا عمل ہے۔

انہوں نے کہا کہ تاجر برادری، حقیقی ورکرز اور علاج کے لیے جانے والے پاکستانیوں کو دبئی، ابو ظہبی، اور شارجہ میں تمام سہولیات فراہم کی جاتی ہیں۔

کراچی قونصلیٹ میں یو اے ای جانے والے افراد کو خصوصی آگاہی دی جاتی ہے کہ وہ ممنوع سامان لے جانے سے گریز کریں اور اپنے سامان کی خود پیکنگ کریں تاکہ انہیں مشکلات کا سامنا نہ کرنا پڑے۔

ڈاکٹر بخیت عتیق الرومیتی نے مزید کہا کہ دونوں ممالک کی بزنس کمیونٹی کے لیے چند دنوں میں نئے پروگرام کا آغاز کیا جائے گا۔

مزید پڑھیں: اوورسیز پاکستانیوں کے ووٹ کے حوالے سے سپریم کورٹ کا فیصلہ

اس پروگرام کے تحت اگر کوئی پاکستانی یو اے ای میں کاروبار کے لیے جانا چاہتا ہے یا متحدہ عرب امارات کی کمپنیوں کو پاکستان لانا چاہتا ہے، تو انہیں بھرپور سہولیات فراہم کی جائیں گی۔