بنوں واقعہ اور آپریشن عزم استحکام کے بارے میں بیرسٹر سیف کا بیان

?️ 23 جولائی 2024

سچ خبریں: بیرسٹر سیف نے کہا کہ بنوں واقعے کی تحقیقات کیلئے کمیشن بنادیا ہے، اعلیٰ اختیاراتی کمیشن سب لوگوں سے مل کر رپورٹ بنائے گا اور آپریشن عزم استحکام سے متعلق وفاقی حکومت کی سب سے بڑی غلطی ایپکس کمیٹی کے اجلاس کے بعد وزیراعظم کا بیان تھا، جس میں فوجی آپریشن کا تاثر دیا گیا، جس سے بے چینی پیدا ہوئی۔

مشیر اطلاعات خیبرپختونخوا بیرسٹر سیف نے بتایا کہ بنوں واقعے کی تحقیقات کے لیے ایک اعلیٰ اختیاراتی کمیشن قائم کر دیا گیا ہے۔ یہ کمیشن تمام متعلقہ افراد سے ملاقات کر کے اپنی رپورٹ تیار کرے گا۔

یہ بھی پڑھیں: آپریشن عزم استحکام کی مخالفت کیوں؟

ترجمان کے پی حکومت نے کہا کہ تحقیقات کے بعد ہی معلوم ہو سکے گا کہ کس نے جان بوجھ کر کیا کردار ادا کیا۔

انہوں نے مزید کہا کہ ڈی جی آئی ایس پی آر کی پریس بریفنگ میں جس انتشاری گروہ کا ذکر کیا گیا تھا، اس کا اشارہ پی ٹی آئی کی طرف تھا۔

انہوں نے خبردار کیا کہ اس طرح کی قبل از وقت بیانات اور الزامات سے تحقیقات متاثر ہو سکتی ہیں۔

بیرسٹر سیف نے کہا کہ عزم استحکام کے حوالے سے وفاقی حکومت کی سب سے بڑی غلطی ایپکس کمیٹی کے اجلاس کے بعد وزیراعظم کا بیان تھا، جس میں فوجی آپریشن کا تاثر دیا گیا اور اس سے بے چینی پیدا ہوئی۔

اس سے قبل ڈی جی آئی ایس پی آر نے پریس کانفرنس میں کہا کہ ایک مضبوط لابی ہے جو چاہتی ہے کہ عزم استحکام کے مقاصد پورے نہ ہوں۔

مزید پڑھیں: آپریشن عزم استحکام کے بارے میں مولانا فضل الرحمان کا بیان

انہوں نے کہا کہ عزم استحکام پر سیاست کی جا رہی ہے اور ایک مافیا، سیاسی مافیا اور غیر قانونی مافیا کھڑا ہوگیا ہے جو کہتا ہے کہ اس منصوبے کو کامیاب نہیں ہونے دینا،یہ سیاسی مافیا چاہتا ہے کہ عزم استحکام کو متنازعہ بنایا جائے۔