پی ٹی آئی کے ایک اور رہنما کا نام ای سی ایل سے خارج

?️ 30 جولائی 2024

سچ خبریں: پاکستان تحریک انصاف کے رہنما شوکت یوسفزئی کا نام ایگزٹ کنٹرول لسٹ سے نکال دیا گیا۔

تفصیلات کے مطابق محکمہ داخلہ نے وفاقی تحقیقاتی ادارے (ایف آئی اے) کو اس حوالے سے مراسلہ ارسال کیا ہے۔

مراسلے میں بتایا گیا ہے کہ یہ فیصلہ پشاور ہائی کورٹ کے حکم پر کیا گیا ہے۔

یہ بھی پڑھیں: ’حج پر جانا چاہتی ہوں، نام ای سی ایل سے نکالا جائے‘، زرتاج گل کا عدالت سے رجوع

یاد رہے کہ 23 جولائی کو پشاور ہائی کورٹ نے شوکت یوسفزئی کا نام ای سی ایل سے نکالنے کا حکم دیا تھا۔

درخواست گزار کے وکیل نے کہا کہ شوکت یوسفزئی کو اسلام آباد ایئرپورٹ پر یورپ جانے سے روکا گیا۔

اس سے پہلے بھی عمرہ کے لیے جاتے ہوئے انہیں روکا گیا تھا اور اب دوبارہ اسلام آباد ایئرپورٹ پر یورپ جانے سے روکا گیا۔

وکیل کا کہنا تھا کہ شانگلہ میں درج ایک ایف آئی آر کی بنیاد پر شوکت یوسفزئی کا نام ای سی ایل میں شامل کیا گیا ہے، حالانکہ اس ایف آئی آر میں وہ ضمانت پر ہیں۔

ڈائریکٹر لیگل ایف آئی اے نے عدالت کو بتایا کہ وزارت داخلہ کے خط کے تحت ان کا نام ای سی ایل میں شامل کیا گیا تھا۔

شوکت یوسفزئی کے وکیل نے دلائل دیتے ہوئے کہا کہ ہوم ڈیپارٹمنٹ نے ہمیں کلیئر کر دیا ہے۔

مزید پڑھیں: القادر ٹرسٹ کیس میں عمران خان سمیت دیگر 28 افراد کے نام ای سی ایل میں ڈالنے کی سفارش

ڈائریکٹر لیگل ایف آئی اے نے کہا کہ ڈی جی سے بات ہوئی ہے اور اگر ہوم ڈیپارٹمنٹ نے انہیں کلیئر کر دیا ہے تو ہمیں کوئی اعتراض نہیں ہے۔

بعد ازاں، عدالت نے شوکت یوسفزئی کا نام ای سی ایل سے نکالنے کا حکم دے دیا۔