اسپیکر نے پی ٹی آئی کے 2 ارکان قومی اسمبلی کے استعفے منظور نہیں کیے

?️ 24 جنوری 2023

اسلام آباد: (سچ خبریں) اسپیکر قومی اسمبلی  راجہ پرویز اشرف نے پی ٹی آئی  کے 2 ارکان قومی اسمبلی کے استعفے منظور نہیں کیے۔ نجی ٹی وی  کے مطابق پی ٹی آئی کے 2 ارکان قومی اسمبلی کے استعفے تاحال منظور نہیں ہوئے، جن 2 ارکان اسمبلی کے استعفے منظور نہیں ہوئے، ان میں سردار طالب اور نواز الٰہی شامل ہیں۔

معلوم ہوا ہے کہ تحریک انصاف کے دونوں اراکین قومی اسمبلی نے استعفوں کے وقت چھٹی کی درخواست دے رکھی تھی اور ان کی یہ درخواست اسمبلی فلور پر پڑھی بھی جاچکی ہے، اس وجہ سے اسپیکر راجہ پرویز اشرف نے ان ایم این ایز کے استعفے منظور نہیں کیے۔

ذرائع کی جانب سے بتایا گیا ہے کہ اسپیکر قومی اسمبلی نے 22 جنوری کو پی ٹی آئی کے 43 مزید استعفے اپریل 2022ء سے منظورکیے اور ان ارکان کو ڈی نوٹیفائی کرنے کے لیے الیکشن کمیشن کو مراسلہ بھی 22 جنوری کو ہی بھیجا گیا تھا۔

ادھر تحریک انصاف کے رہنما فواد چوہدری نے کہا ہے کہ اسمبلی تو اس وقت ربڑ اسٹیمپ بن کر رہ گئی ہے، شہباز شریف کو اعتماد کا ووٹ نہ لینا پڑے اس لیے راجہ ریاض کو بچا رہے ہیں، 172 لوگوں کی اکثریت شہباز شریف کے پاس نہیں رہی، یہ لوٹوں کے سہارے حکومت کرنا چاہتے ہیں۔

فواد چوہدری نے پی ٹی آئی کے مزید 43 ارکان قومی اسمبلی کے استعفے منظور کیے جانے پر ردِعمل میں کہا کہ ہم پہلے کہہ رہے تھے کہ استعفے منظور کیے جائیں، ہم نے الیکشن کمیشن کو لکھ کردیا کہ استعفوں کو ڈی نوٹیفائی نہ کیا جائے، حکمرانوں کا مقصد راجہ ریاض کو بچانا ہے کیونکہ راجہ ریاض وہ طوطا ہے جس میں شہبازشریف کی جان ہے حالاں کہ 40 فیصد اسمبلی خالی ہے اور لوگوں کا اعتبار ختم ہو گیا ہے۔

رہنما تحریک انصاف نے دعویٰ کرتے ہوئے کہا کہ 172 لوگوں کی اکثریت شہبازشریف کے پاس نہیں رہی، حکمرانوں نے پوری پارلیمنٹ کو 3 دن کے لیے بند کردیا، ملک کے بحران کا حل الیکشن کے بغیر ممکن نہیں، الیکشن کمیشن کٹھ پتلی ہے اور یہ کچھ نہیں کر سکتا، اسمبلی اس وقت صرف ربڑ اسٹیمپ بن کر رہ گئی، ہماری جماعت پرامن احتجاج پر یقین رکھتی ہے۔