راولپنڈی(سچ خبریں )بہاولپور کور کے زیر اہتمام پاک فوج کی ٹریننگ مشقوں کے دوران مقامی سکولوں، کالجوں اور یونیورسٹی کے 500سے زائد طلبا و طالبات اور اساتذہ نے ایک دن چولستان میں بہاولپور کور کے ساتھ گزارا۔
اس ایک روزہ پروگرام کا مقصد نوجوان نسل کو پاک فوج کی دفاعی ذمہ داریوں اور پیشہ ورانہ صلاحیت کے بارے میں آگاہ کرنا تھا، آئی ایس پی آر کے مطابق ایک دن فوج کے ساتھ پروگرام کے آغاز میں طلبہ کو پاک فوج کے جوانوں کی پیشہ ورانہ مہارت سے متعلق ایک عملی مظاہرہ دکھایا گیا، طلبہ نے ٹینک اور اے پی سی کی سواری کی اور پاک فوج کے زیرِ استعمال اسلحہ اور جنگی آلات کا بھی جائزہ لیا۔
اس کے علاوہ طلبہ نے ملٹی بیرل راکٹ لانچر کا فائر دیکھا جس کے دوران پی اے ایف کے جنگی طیاروں نے بھی حملے کا مظاہرہ کیاجس کو دیکھ کر طلبہ کا جوش و جذبہ قابلِ دید تھا، آخر میں طلبہ نے کور کمانڈر بہاولپور سے ملاقات کی اور پاک آرمی کی پیشہ ورانہ قابلیت کی بے حد تعریف کی۔
