ہم صرف مشاورتی اجلاس کیلئے لاہور جا رہے ہیں کوئی جلسہ یا احتجاج نہیں کر رہے ، بیرسٹرگوہر

?️ 12 جولائی 2025

اسلام آباد: (سچ خبریں) پاکستان تحریک انصاف کے چیئرمین بیرسٹرگوہر کا کہنا ہے کہ ہم صرف مشاورتی اجلاس کیلئے لاہور جا رہے ہیں، ہم کوئی جلسہ یا احتجاج نہیں کر رہے بلکہ صرف پارٹی پارلیمنٹرینز کے ساتھ ملاقات ہے، گرفتاریوں کا کوئی امکان نہیں،خیبرپختونخواہ ہاؤس اسلام آباد پہنچنے پر میڈیا سے گفتگو کرتے ہوئے بیرسٹرگوہر نے کہا کہ ہماری تحریک پرامن ہے۔

بیرسٹرگوہر نے ہماری تحریک کامقصد صرف اور صرف بانی پی ٹی آئی عمران خان کی رہائی ہے۔ہم پرامن شہری ہیں ہمارا مقصد انتشار کی سیاست کرنا نہیں ہے اس موقع پر میڈیا سے گفتگوکرتے ہوئے پاکستان تحریک انصاف کے سیکرٹری جنرل سلمان اکرم راجہ کا کہنا تھا کہ ہم کسی احتجاجی اقدام کیلئے لاہور نہیں جا رہے۔

ہم اپنے پارٹی رہنماؤں سے پارٹی معاملات پر مشاورت کرینگے او ر واپس آجائیں گے۔

پنجاب اسمبلی کے اپوزیشن لیڈر ملک احمد خان بھچر بھی خیبرپختونخواہ ہاؤس اسلام آباد پہنچے جہاں انہوں نے پی ٹی آئی کی مرکزی قیادت سے مشاورت کی۔پاکستان تحریک انصاف نے اپنی احتجاجی تحریک کو منظم اور مؤثر بنانے کیلئے آج خیبرپختونخواہ ہاؤس پنجاب اور لاہور میں مشترکہ پارلیمانی پارٹی کا اہم اجلاس طلب کیاہوا ہے۔ اجلاس میں قومی اور صوبائی اسمبلیوں کے تمام منتخب اراکین کو مدعو کیا گیا ہے جس کا مقصد آئندہ کے لائحہ عمل پر مشاورت اور تحریک کے اگلے مرحلے کو حتمی شکل دینا ہے۔

پارٹی ذرائع کے مطابق اجلاس کے دوران موجودہ سیاسی صورتحال، احتجاجی حکمت عملی، اور کارکنوں کی متحرک شرکت جیسے امور پر تفصیلی بات چیت کی جائے گی۔ اجلاس میں ایم این ایز، ایم پی ایز، اور پارٹی کی اعلیٰ قیادت شرکت کرے گی جن سے تجاویز بھی طلب کی گئی ہیں۔بعدازاں خیبرپختونخوا ہاؤس اسلام آباد سے پی ٹی آئی کے ارکان قومی و صوبائی اسمبلی اور سینئر رہنما علی امین گنڈاپور کی قیادت میں قافلے کی صورت میں لاہور روانہ ہوگئے۔

قافلے میں شامل اراکین کا کہنا ہے کہ اجلاس کے بعد وہ فوری طور پر واپس آ جائیں گے۔ذرائع کایہ بھی کہنا ہے کہ وزیراعلیٰ خیبرپختونخواہ علی امین گنڈاپور آج شام تک لاہور پہنچیں گے جہاں ان کی ملاقاتیں اپوزیشن لیڈر پنجاب ملک احمد خان بھچڑ سمیت پی ٹی آئی کے سینئر رہنماؤں اور پنجاب اسمبلی کے ارکان سے متوقع ہیں۔دورہ لاہور کے دوران علی امین گنڈاپور پارٹی رہنماؤں سے ملاقاتوں میں آزادی تحریک کی آئندہ حکمت عملی پر تفصیلی گفتگو کرینگے۔یہ اہم اجلاس ایک ایسے وقت میں ہو رہا ہے جب پی ٹی آئی ملک گیر احتجاجی سرگرمیوں کی دوبارہ تنظیم کی طرف بڑھ رہی ہے اور پارٹی کے قائدین آئندہ دنوں میں سیاسی دباؤ بڑھانے کی حکمت عملی پر غور کر رہے ہیں۔