کیا پابندیاں خاندان کے افراد پر لاگو ہوتی ہیں ؟،علیمہ خان نے عمران خان سے مخصوص لوگوں کی ملاقات پرسوالات اٹھا دئیے

?️ 3 اپریل 2025

راولپنڈی: (سچ خبریں) کیا عید کی چھٹیوں کی پابندیاں صرف خاندان کے افراد پر لاگو ہوتی ہیں ؟ بانی پی ٹی آئی کی ہمشیرہ علیمہ خان نے بانی پی ٹی آئی عمران خان سے مخصوص لوگوں کی ملاقات کرانے پر سوالات اٹھا دئیے،سماجی رابطے کی ویب سائٹ ایکس (ٹوئیٹر )پر اپنے شیئر کردہ بیان میں انہوں نے کہا کہ ہمیں عمران خان سے ملاقات کی اجازت نہیں دی گئی اور نہ ہی انہیں اپنے بیٹوں سے بات کرنے کی اجازت ہے۔

ہمیں جیل حکام کی جانب سے صاف طور پر بتایا گیا تھا کہ عید کی چھٹیوں کے دوران خاندان کو عمران خان سے ملاقات کی اجازت نہیں دی جائے گی۔علیمہ خان نے اپنے بیان میں یہ سوال بھی اٹھایا کہ یہ کیسے ممکن ہے کہ ہمیں عمران خان سے ملنے کی اجازت نہیں دی گئی لیکن کچھ لوگوں کو ان سے ملنے کی اجازت دی گئی ہے ؟ کیا عید کی چھٹیوں کی پابندیاں صرف خاندان کے افراد پر لاگو ہوتی ہیں ؟

ان کا کہنا تھا کہ آخری بار ہم اپنے بھائی سے منگل 20 مارچ کو ملے تھے۔ پچھلے منگل 27 مارچ کو ہمیں اپنے بھائی سے ملنے کی اجازت نہیں دی گئی تھی۔واضح رہے کہ راولپنڈی کی اڈیالہ جیل میں بانی پی ٹی آئی عمران خان سے پارٹی رہنماءاعظم سواتی ،وزیراعلیٰ خیبرپختونخواہ علی امین گنڈاپور،بیرسٹر سیف ودیگر نے ملاقات کی تھی ۔بانی پی ٹی آئی عمران خان نے وزیراعلیٰ خیبرپختونخواہ علی امین گنڈاپور اور مشیر اطلاعات خیبرپختونخواہ بیرسٹرسیف کو اسٹیبلشمنٹ سے مذاکرات کرنے کا ٹاسک دیدیاتھا۔

علی امین گنڈاپور اور مشیر اطلاعات بیرسٹر سیف نے راولپنڈی کی اڈیالہ جیل میں ڈھائی گھنٹے طویل ملاقات کی تھی جس میں سٹیبلشمنٹ کے ساتھ مذاکرات اور پارٹی کے اندرونی معاملات پر تفصیلی گفتگو ہوئی تھی۔جیل میں ہونے والی ڈھائی گھنٹے ملاقات کا محورسٹیبلشمنٹ سے مذاکرات تھا اور علی امین گنڈاپور، بیرسٹرسیف بانی پی ٹی آئی عمران کو قائل کرنے میں کامیاب ہوگئے تھے۔

اڈیالہ جیل میں ہونے والی ملاقات کھلے ماحول میں فری ٹائم کے ساتھ کرائی گئی تھی۔ اس کے علاوہ علی امین گنڈا پور کی بانی پی ٹی آئی سے جیل میں ون آن ون ملاقات بھی ہوئی تھی۔ذرائع کاکہنا تھا کہ ملاقات کے دوران بانی پی ٹی آئی نے علی امین گنڈاپور اور بیرسٹر سیف کوسٹیبلشمنٹ کے ساتھ مذاکرات کرنے کی اجازت دیتے ہوئے ہدایات کیں تھیں کہ جب تک مذاکرات میں کوئی ٹھوس پیش رفت نہیں ہوتی اسے راز میں رکھا جائے گا۔ذرائع کے مطابق علی امین گنڈاپور نے صوبائی معاملات پربھی بانی پی ٹی آئی کو بریف کیا اور ملاقات میں قیادت پر سوشل میڈیا پرجاری تنقید بھی زیر بحث آئی جبکہ ملاقات میں اداروں سے ٹکراو کی پالیسی پر نظرثانی پر بھی بات ہوئی تھی۔