کشیدگی کم کرنے کے لیے مصری وزیرِ خارجہ کے ایران، امریکہ اور علاقائی ممالک سے بھرپور رابطے

کشیدگی کم کرنے کے لیے مصری وزیرِ خارجہ کے ایران، امریکہ اور علاقائی ممالک سے بھرپور رابطے

خطے میں بڑھتی ہوئی کشیدگی کے تناظر میں مصر کے وزیرِ خارجہ بدر عبدالعاطی نے ایران، امریکہ اور متعدد علاقائی ممالک کے اعلیٰ حکام سے مسلسل رابطے کیے ہیں اور مسائل کے حل کے لیے سفارتکاری کی طرف واپسی اور عسکری راستوں سے گریز پر زور دیا ہے۔

مصری میڈیا کے مطابق، بدر عبدالعاطی نے صدر عبدالفتاح السیسی کی ہدایات کے تحت ایران کے وزیرِ خارجہ سید عباس عراقچی، مشرقِ وسطیٰ کے لیے امریکی خصوصی نمائندے اسٹیو وٹکاف، قطر کے وزیرِ اعظم و وزیرِ خارجہ محمد بن عبدالرحمن آل ثانی، ترکیہ کے وزیرِ خارجہ حاکان فیدان اور عمان کے وزیرِ خارجہ بدر بن حمد البوسعیدی سے تفصیلی ٹیلی فونک گفتگو کی۔

مصری وزارتِ خارجہ کے جاری کردہ بیان میں کہا گیا ہے کہ ان رابطوں کے دوران مشرقِ وسطیٰ میں تیزی سے بدلتی صورتحال اور حالیہ کشیدگی پر تبادلۂ خیال کیا گیا، جبکہ حالات کو قابو میں رکھنے اور خطے میں استحکام بحال کرنے کے لیے پرامن حل تلاش کرنے پر توجہ دی گئی۔

بیان کے مطابق، یہ مشاورتیں کشیدگی میں کمی، اعتماد سازی اور بات چیت کے ذریعے مطلوبہ امن کے حصول پر مرکوز رہیں۔ مصری وزیرِ خارجہ نے فریقین کے درمیان تعمیری اور مسلسل رابطے کی اہمیت پر زور دیتے ہوئے کہا کہ اس عمل سے امریکہ اور ایران کو دوبارہ مذاکرات کی میز پر لانے میں مدد مل سکتی ہے۔

بدر عبدالعاطی نے باہمی احترام اور مشترکہ مفادات کی بنیاد پر ایک جامع اور پرامن معاہدے کی ضرورت پر بھی زور دیا، جو خطے میں دیرپا سلامتی اور استحکام کو تقویت دے سکے۔

انہوں نے واضح کیا کہ خطے کو درپیش پیچیدہ چیلنجز کا کوئی عسکری حل موجود نہیں اور پائیدار نتائج صرف سفارتکاری اور مکالمے کے ذریعے ہی حاصل کیے جا سکتے ہیں۔

مصری وزارتِ خارجہ کے مطابق، ان رابطوں کے اختتام پر تمام فریقین نے کشیدگی کم کرنے کی کوششیں جاری رکھنے اور علاقائی تنازعات کے حل کے لیے سفارتی ذرائع کو بنیادی راستہ قرار دینے پر اتفاق کیا۔