کوہاٹ؛ سی ٹی ڈی اور پولیس کی اہم کارروائی، تخریب کاری کی منصوبہ بندی کرنے والے 6 دہشتگرد ہلاک

?️ 15 مارچ 2026

کوہاٹ (سچ خبریں) کوہاٹ کی تحصیل لاچی میں سی ٹی ڈی اور پولیس کی اہم کارروائی کے دوران تخریب کاری کی منصوبہ بندی کرنے والے چھ دہشتگرد ہلاک ہو گئے۔

ڈی پی او شہباز الٰہی کے مطابق دہشت گردوں کی موجودگی کے حوالے سے خفیہ اطلاع پر سی ٹی ڈی اور پولیس نے پہاڑی علاقے میں آپریشن کا آغاز کیا اس دوران دہشت گردوں نے پولیس پر فائرنگ کردی۔ جوابی کارروائی میں چھ دہشتگرد ہلاک ہوگئے، دہشت گردوں سے اسلحہ بھی برآمد کرلیا گیا۔ علاقے کو مکمل طور پر گھیرے میں لے کر سرچ آپریشن جاری ہے، لاشوں کو قریبی اسپتال منتقل کر لیا گیا۔

دوسری جانب وفاقی وزیر داخلہ محسن نقوی نے کوہاٹ میں فتنہ الخوارج کیخلاف کامیاب آپریشن پر پولیس اور سی ٹی ڈی کو شاباش دی ہے وزیر داخلہ نے خیبرپختونخوا پولیس اور سی ٹی ڈی کی پیشہ وارانہ مہارت کو سراہتے ہوئے کہا چھ دہشتگردوں کو جہنم رسید کرنے پر قوم کے بہادر سپوتوں کو سلام پیش کرتا ہوں، خیبرپختونخوا پولیس اور سی ٹی ڈی کے دلیرجوانوں پر فخر ہے۔

وفاقی وزیر داخلہ محسن نقوی نے کہا خیبرپختونخوا میں قیام امن کیلئے پولیس اور سی ٹی ڈی کی کارروائیاں قابل تعریف ہیں۔