کورونا:ملک بھر میں  مسلسل دوسرے روز 100 سے زائد اموات

?️ 7 اپریل 2021

اسلام آباد(سچ خبریں) کورونا کے اعداد و شمار کے لیے بنائی گئی سرکاری ویب سائٹ کے مطابق پاکستان میں گزشتہ 24 گھنٹوں کے دوران 4 ہزار 4 افراد میں وائرس کی تشخیص ہوئی اور 102 مریض انتقال کر گئے۔ملک بھر  میں لگاتار دوسرے روز 100 سے زائد اموات ریکارڈ کی گئی ہیں۔

وائرس کی تشخیص کے لیے 6 اپریل کو مجموعی طور پر 41 ہزار 699 ٹیسٹس کیے گئے جس کے نتیجے میں ملک میں کورونا کیسز مثبت آنے کی شرح 9.6 فیصد رہی جبکہ فعال کیسز 64 ہزار 373 تک پہنچ چکے ہیں۔ملک بھر میں مجموعی طور پر اب تک کورونا وائرس سے 7 لاکھ 188 افراد متاثر ہو چکے ہیں جن میں سے 15 ہزار 26 زندگی کی بازی ہار چکے ہیں۔

علاوہ ازیں گزشتہ 24 گھنٹے کے دوران مزید 2 ہزار 631 مریض صحتیاب ہوئے اور مجموعی طور پر اب تک 6 لاکھ 20 ہزار 789 مریض صحتیاب ہوچکے ہیں۔واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے ملک میں وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں۔

تیسری لہر کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگایا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ زیادہ متاثرہ علاقوں میں تعلیمی ادارے بھی بند ہیں۔