کوئٹہ دھماکہ؛ سکیورٹی فورسز کی جوابی کارروائی میں 5 دہشتگرد ہلاک، 2 ایف سی جوان زخمی

?️ 30 ستمبر 2025

کوئٹہ: (سچ خبریں) صوبہ بلوچستان کے دارالحکومت کوئٹہ میں خود کش دھماکے کے بعد سکیورٹی فورسز کی جوابی کارروائی میں 5 دہشت گرد مارے گئے۔

میڈیا رپورٹس کے مطابق سکیورٹی فورسز ذرائع کا کہنا ہے کہ کوئٹہ میں بھارتی پراکسی فتنہ الہندوستان نے گاڑی سے خودکش حملہ کیا جس میں خودکش حملہ آور کے علاوہ 5 دہشتگرد جہنم واصل ہوگئے، حملہ آور ایف سی کی وردی میں ملبوس تھے جو سب مارے گئے، حملے میں 2 ایف سی جوان زخمی ہیں، بھارت کے ایجنڈے پر کام کرنے والے شرپسند عناصر کے ناپاک عزائم کو ناکام بناتے رہیں گے۔

بتایا گیا ہے کہ صوبہ بلوچستان کے دارالحکومت کوئٹہ میں ایف سی وردی میں ملبوس دہشتگردوں کے خودکش دھماکے میں 6 افراد جاں بحق اور کئی زخمی ہوگئے، یہ واقعہ کوئٹہ کے علاقے ماڈل ٹاؤن میں فرنٹیئر کور یعنی ایف سی ہیڈ کوارٹرز کے قریب پیش آیا جہاں ایک زور دار دھماکہ ہوا، دھماکے میں زخمیوں کو فوری طور پر سول ہسپتال کوئٹہ منتقل کیا گیا جہاں بعض زخمیوں کی حالت تشویشناک ہے، صوبائی وزیر صحت بخت کاکڑ نے بتایا کہ دھماکے کے نتیجے میں جاں بحق ہونے والے افراد کی تعداد 6 ہوگئی ہے اور زخمیوں کی تعداد 10 ہے، سول ہسپتال کوئٹہ میں ایمرجنسی نافذ کردی گئی اور ڈاکٹروں کو فوری طور پر ڈیوٹی پر بلالیا۔

معلوم ہوا ہے کہ دھماکے کی آواز کئی کلومیٹر دور تک سنائی دی گئی اور جائے وقوعہ پر دھوئیں کے بادل چھا گئے، دھماکے کی وجہ سے علاقے میں خوف و ہراس پھیل گیا اور فائرنگ کی آوازیں بھی سنی گئیں، دھماکے سے اطراف کی کئی عمارتوں کے شیشے بھی ٹوٹ گئے، ایک موٹر سائیکل، رکشہ اور قریبی کھڑی گاڑیاں بری طرح متاثر ہوئیں، دھماکے کی اطلاع ملتے ہی ریسکیو ٹیمیں اور پولیس کی بھاری نفری جائے وقوعہ پر پہنچ گئی جنہوں نے علاقے کو گھیرے میں لے کر تفتیش شروع کردی، بم ڈسپوزل سکواڈ کو بھی طلب کرلیا گیا تاکہ دھماکے کی نوعیت اور اس میں استعمال ہونے والے بارودی مواد کا تعین کیا جا سکے۔