کسی شہری کو قانون ہاتھ میں لینے کا حق نہیں: شفقت محمود

?️ 17 فروری 2022

اسلام آباد (سچ خبریں) وفاقی وزیر تعلیم شفقت محمود کا کہنا ہے کہ کسی شہری کو قانون ہاتھ میں لینے کا حق نہیں ہے، ہم عدالت کے ہر حکم پر عمل کریں گے۔ پولیس پر فائر کھولنے کی روایت ٹھیک بالکل  نہیں ہے، قانون سب کے لئے ہے اور اس کی بالادستی کو ماننا ضروری ہے۔

شفقت محمود نے انسداد دہشت گردی عدالت کے باہر میڈیا سے گفتگو کرتے ہوئے کہا کہ ساڑھے 7 سال پہلے سیاسی حریفوں کو دبانے کیلئے نواز شریف نے مقدمہ درج کرایا، آج عدالت نے طلب کیا ہمیں اور ہم حاضر ہوئے ہیں۔انہوں نے بتایا کہ عدالت میں وکیل نے دلائل دیئے ہیں، کچھ ثابت نہیں ہوا، ایسے مقدمے میں عمران خان صاحب بری ہو چکے ہیں۔

صحافی جانب سے گزشتہ روز پیش آئے واقعے سے متعلق سوال کے جواب میں وفاقی وزیر نے کہا کہ مجھے تو کل جو واقعہ ہوا اس کی تفصیلات نہیں پتہ، ایک صاحب کے خلاف ایف آئی آر تھی، ایف آئی اے گرفتاری کیلئے گئی تو انہوں نے پستول نکال لیا۔شفقت محمود نے کہا کہ میں نے گرفتاری کی تصویر دیکھی ہے جس میں ملزم نے پستول پکڑی ہوئی ہے، تصویر میں ملزم پولیس اہلکار کو مار بھی رہا ہے۔

وفاقی وزیر نے کہا کہ پولیس پر فائر کھولنے کی روایت ٹھیک نہیں، کسی بھی شہری کو حق نہیں کہ قانون کو ہاتھ میں لے، قانون کی بالادستی کو ماننا چاہیے، ہم سب بھی آج عدالتوں میں ہیں۔انہوں نے کہا کہ ہر شہری کو حق حاصل ہے کہ وہ درخواست دے سکتا ہے، درخواست پر تحقیقات اداروں کا کام ہے۔