پوری قوم کی نظریں سپریم کورٹ پرہیں، فیصل جاوید

?️ 7 جون 2024

اسلام آباد: (سچ خبریں) پاکستان تحریک انصاف کے رہنماء فیصل جاوید کا کہنا ہے کہ پوری قوم کی نظریں سپریم کورٹ پرہیں، عوام فارم47 والوں کو مسترد کرچکے ہیں،مذاکرات صرف حقیقی عوامی نمائندوں سے ہونے چاہیں، عوام نے جس کو ووٹ دیا ہے وہ اصل میں عوام کے نمائندے ہوتے ہیں۔رہنماءپی ٹی آئی نے گزشتہ روز سپریم کورٹ میں نیب ترامیم کیس میں بانی پی ٹی آئی عمران خان کے دلائل پر اپنے ردعمل میں کہا ہے کہ کل کی سماعت پی ٹی آئی کیلئے تاریخی لمحہ تھا۔

با نی پی ٹی آئی نے عدالت میں عوامی مسائل پر بات کی۔ لائیو سٹریمنگ کا مسئلہ بھی عدالت کے سامنے بانی پی ٹی آئی نے رکھا تھا۔ بانی پی ٹی آئی نے عدالت کو بتایا کہ نیب چلا کون رہا ہے، یہ دیکھنا ہوگا۔ بانی پی ٹی آئی نے کہا کہ اگر ترمیم کالعدم ہوئی تو میرا فائدہ ہوگا لیکن ملک کا دیوالیہ ہو جائے گا۔

بانی پی ٹی نے ملک سے باہر اربوں روپے بھیجے جانے کا مسئلہ بھی کل کی سماعت میں عدالت کے سامنے رکھا۔

حقیقی جمہوریت ایسے ہی کام کرتی ہے منتخب نمائندے ہی پارلیمان میں آتے ہیں۔رہنماءپی ٹی آئی فیصل جاوید کا مزید کہنا تھا کہ بانی پی ٹی آئی نے اینٹی منی لانڈرنگ میں اپنے دور حکومت میں اپوزیشن سے معاونت مانگی تھی مگر اپوزیشن نے اس وقت عمران خان کا ساتھ نہیں دیا تھا۔ فیٹف کی قانون سازی منی لانڈرنگ کیلئے کی گئی تھی۔ بانی پی ٹی آئی نے اپوزیشن کو کہا تھاکہ فیٹف کی قانون سازی میں حصہ لیں مگر اپوزیشن نے اس کے جواب میں بلیک میلنگ شروع کردی تھی کہ ہم نیب ترامیم لائیں گے۔ بانی پی ٹی آئی نے اپوزیشن کو دعوت دی کہ تھی آئیں اینٹی منی لانڈرنگ پر قانون سازی کرتے ہیں۔بانی پی ٹی آئی نے اپنے دور میں کسی پر کوئی پرچہ نہیں درج کروایا۔