پاکستان کو افغان امن اجلاس میں مدعو کیا گیا

🗓️ 11 مارچ 2021

اسلام آباد(سچ خبریں) روسی نیوز وائیر ٹی اے ایس ایس نے افغانستان کے لیے روس کے صدارتی ایلچی ضمیر کابلوف کے حوالے سے بتایا کہ امریکا، چین، پاکستان، افغان حکومت اور طالبان کو افغانستان میں پرامن تصفیہ سے متعلق آئندہ توسیع شدہ سہ فریقی مشاورت میں شرکت کی دعوت دی گئی ہے پاکستان کو روس نے 18 مارچ کو ماسکو میں ہونے والے افغان امن عمل سے متعلق ’توسیعی کنسورشیم‘ کے اجلاس میں مدعو کیا ہے۔

روسی نیوز وائیر ٹی اے ایس ایس نے افغانستان کے لیے روس کے صدارتی ایلچی ضمیر کابلوف کے حوالے سے بتایا کہ امریکا، چین، پاکستان، افغان حکومت اور طالبان کو افغانستان میں پرامن تصفیہ سے متعلق آئندہ توسیع شدہ سہ فریقی مشاورت میں شرکت کی دعوت دی گئی ہے۔

روس کے صدارتی ایلچی ضمیر کابلوف نے کہا کہ یہ ایک کانفرنس بھی نہیں ہے، یہ مشاورت پر مبنی توسیع کنسورشیم ہے جس میں روس، امریکا، چین اور پاکستان کے علاوہ افغان حکومت کے نمائندوں، سیاست دانوں اور طالبان کے وفد کو بھی مدعو کیا ہے۔

خیال رہے کہ ضمیر کابلوف 19 فروری کو پاکستان پہنچے تھے اور انہوں نے ماسکو کے اس اجلاس کے انعقاد کے منصوبے پر تبادلہ خیال کیا تھا۔اس موقع پر پاکستان نے افغانستان میں امن اور مفاہمت کے لیے روسی کوششوں کی حمایت کرنے کا اعلان کیا تھا۔

علاوہ ازیں دفتر خارجہ کے ترجمان زاہد حفیظ چوہدری نے کہا کہ وزیر خارجہ نے علاقائی مشاورت کی اہمیت پر روشنی ڈالی اور افغان امن عمل کی حمایت میں چار فریقی مذاکرات کے کردار کو سراہا۔

افغان ہائی کونسل برائے قومی مفاہمت فریدون خوازون نے میں کہا کہ اہم افغان سیاستدانوں کو افغانستان سے متعلق اجلاس میں شرکت کی دعوت دی گئی ہے۔

روس کی جانب سے افغان امن عمل میں مثبت پیش رفت کے لیے مذاکرات کا کوشش ایسے وقت پر کی جارہی ہے جب امریکا نے بھی افغانستان میں امن کے لیے زور دیا ہے۔

خیال رہے کہ افغانستان میں امریکی خصوصی مندوب زلمے خلیل زاد نے چیف آف آرمی اسٹاف جنرل قمر باجوہ سے اسلام آباد میں ملاقات کی تھی۔

امریکی سفارتخانے کے مطابق انہوں نے افغانستان میں منصفانہ اور پائیدار امن کی طرف پیشرفت کو تیز کرنے کی ضرورت پر زور دیا تھا۔

امریکی کی جوبائیڈن انتظامیہ اقوام متحدہ سے روس، چین، پاکستان، ایران، بھارت اور امریکا کے وزرائے خارجہ اور سفیروں کا اجلاس بلانے کی درخواست کرنے کی بھی منصوبہ بندی کر رہا ہے تاکہ علاقائی ممالک اس اتحاد کی حمایت کے لیے یکطرفہ طرز عمل تیار کرنے کے لیے ملاقات کرسکیں۔