پاکستان نے بھارتی وزارت داخلہ کا بیان مسترد کر دیا

?️ 30 جون 2021

اسلام آباد (سچ خبریں) پاکستان نے بھارتی وزارت داخلہ کا مقبوضہ کشمیرمیں ڈرون حملوں میں پاکستانی مداخلت کے بیان پر شدید ردعمل کا اظہار کرتے ہوئے  خبردار کیا کہ بھارت پاکستان مخالف جھوٹے پروپیگنڈے سے باز رہے۔بھارت کا پاکستان پر ڈرون حملے میں ملوث ہونے کا بیان من گھڑت ہے۔

تفصیلات کے مطابق ترجمان دفترخارجہ زاہد حفیظ کی جانب سے بھارتی وزارت داخلہ کے مقبوضہ کشمیرمیں ڈرون حملوں میں پاکستانی مداخلت کے بیان کو سختی سے مسترد کرتے ہوئے کہا جی کشن ریڈی کا پاکستان پر ڈرون حملے میں ملوث ہونے کا بیان من گھڑت ہے۔

ترجمان دفتر خارجہ زاہد حفیظ کا کہنا تھا کہ بغیر کسی ثبوت بھارتی سرکار نے ایک بار پھر پاکستان پر الزام تراشی کی، یہ بھارتی حکومت،بھارتی میڈیا کی پاکستان مخالف پروپیگنڈا مہم کی ایک اورمثال ہے، بھارت کاوطیرہ ہےاندرونی معاملات میں پاکستان پرالزام تراشی کےذریعہ توجہ ہٹائے۔

ترجمان دفترخارجہ نے مزید کہا کہ بھارت مقبوضہ کشمیر میں جدوجہد آزادی سے توجہ ہٹانے کیلئے ایسے الزام لگاتا ہے، الزامات ثابت کرتے ہیں کہ بھارت فالس فلیگ آپریشن سےپاکستان کوبدنام کر سکتا ہے۔ان کا کہنا تھا کہ بھارت میں سیاسی ناکامی چھپانے ،انتخابات جیتنےکیلئےہمیشہ پاکستان کارڈاستعمال کیاگیا، مطالبہ ہے کہ بھارت پاکستان مخالف جھوٹے پروپیگنڈےسے باز رہے۔