پاکستان میں فائزر ویکسین لگانے کا آغاز ہو گیا

?️ 14 جون 2021

اسلام آباد (سچ خبریں) حکومت پاکستان کی جانب سے فائزر ویکسین کے بارے میں ہدایت نامہ جاری کرتے ہوئے پاکستان میں فائزر ویکسین لگانے کا آغازکر دیا ہے۔ یہ ویکسین صرف دل، جگر، گردے سمیت دائمی امراض میں مبتلا افراد کو لگے گی۔ تاہم اوورسیز پاکستانیوں نے حکومت سے مطالبہ کیا ہے کہ انہیں بھی فائزر ویکسین لگائی جائے۔

تفصیلات کے مطابق پاکستان میں فائزر ویکسین لگانے کا آج آغاز ہو گیا، محکمہ صحت نے ہدایت کی کہ فائزر ویکسین لگوانے کے لیے میڈیکل ریکارڈ ہمراہ لائیں۔فائزر ویکسین آج سے صرف ایف نائن اسلام آباد میں قائم ویکسی نیشن سینٹر میں دسیتاب ہوگی۔ لیکن اوورسیز پاکستانیوں نے اسلام آباد کے ایف نائن پارک کے کویڈ 19 کی ویکسنیشن سنٹر میں ماس ویکسینیشن سینٹر کے باہر احتجاجی مظاہرہ کیا ، مظاہرے میں مختلف شہروں سے اوورسیز پاکستانی آئے اور شریک ہوئے ۔

مظاہرے کے دوران اوورسیز پاکستانیوں نے بینرز اور پلے کارڈز اپٹھا رکھے تھے اور مظاہرین نے اپنے مطالبات کے حق میں نعرے بازی بھی کی۔مظاہرین نے حکومت سے اوورسیز پاکستانیوں کو فائزر ویکسین لگانے کا مطالبہ کرتے ہوئے کہا کہ کورونا وباء کے دوران چھٹیوں پر بیرون ممالک سے پاکستان آئے تھے، بیرون ملک واپس جانے کے لیے فائزر ویکسین لگوانا لازمی ہے۔

مظاہرین نے کہا کہ حکومت نے فائزر ویکسین لگانے کا اعلان کیا تھا لیکن ماس ویکسنیشن سنٹر میں فائزر ویکسین نہیں لگائی جا رہی ، فائزر ویکسین نہ لگوانے پر مطلوبہ ممالک داخلے پر پابندی ہے، حکومت اوورسیز پاکستانیوں کے لیے فائزر ویکسین کا فوری انتظام کرے۔

یہاں یہ بات قابل ذکر ہے کہ چند روز قبل چند روز قبل حکومت نے فائزر کورونا ویکسین کے استعمال کی حکمت عملی تبدیل کردی تھی،  ذرائع کے مطابق بیرون ملک جانے والے افراد ، اسٹڈی، ورک ویزہ پر جانے والوں کوفائزر ویکسین نہ لگانے کا فیصلہ کیا گیا تھا جس کے تحت فائزرویکسین صرف حجاج اور دائمی امراض کے شکارافراد کو لگائی جائے گی۔ حکومت کا کہنا ہے کہ فائزر کی دوسری کھیپ ملنے پر بیرون ملک جانے والوں کو لگائی جائے گی اور فائزر ویکسین 15 شہروں کے مخصوص ویکسینیشن سینٹرز پر دستیاب ہو گی۔