پاکستان میں ایک روز میں سب سے زیادہ کورونا ویکسین لگانے کا ریکارڈ بن گیا

?️ 1 ستمبر 2021

لاہور (سچ خبریں) تفصیلات کے مطابق وفاقی وزیر برائے منصوبہ بندی، ترقی ، اصلاحات و خصوصی اقدامات اور این سی او سی کے سربراہ اسد عمر نے کہا ہے کہ پاکستان میں ایک روز میں سب سے زیادہ کورونا وائرس سے بچائو کی ویکسین لگانے کا ریکارڈ بن گیا ہے۔

اپنے بیاں میں انہوں نے کہا کہ گزشتہ روز 14 لاکھ 5 ہزار 352 افراد نے ویکسین کی خوراکیں لگوائی ہیں۔ یہ تعداد ملک بھر میں یومیہ ویکسی نیشن کی اب تک سب سے زیادہ ہے۔ مجموعی طور پر 5 کروڑ 51 لاکھ 78 ہزار 137 شہری ویکسین کی خوراکیں لگوا چکے ہیں۔ انہوں نے لوگوں سے ایک مرتبہ پھر سے بھرپور اپیل کی ہے کہ وہ کورونا ایس اوپیز سے پر عمل کریں اور جلد از جلد ویکسین لگوائیں تا کہ اس موذی وبا سے جان چھڑائی جا سکے۔

دوسری جانب پنجاب حکومت نے ویکسین نہ لگوانے والوں کیخلاف سخت اقدامات اٹھانے کا فیصلہ کر لیا۔ ذرائع کے مطابق کمشنر آفس لاہور میں کورونا وائرس کا پھیلاؤ روکنے اور ایس اوپیز، ویکسین لگوانے کیلئے اقدامات کرنے کے حوالے سے جائزہ اجلاس ہوا، اجلاس میں بغیر ویکسی نیشن شہریوں کیخلاف مزید سختیاں کرنے کا فیصلہ کیا گیا۔کمشنر لاہور کی زیرصدارت اجلاس میں فیصلہ کیا گیا کہ ویکسین نہ لگوانے والے سرکاری ملازمین پر پیڈ ایکٹ لگایا جائےگا۔

یکم ستمبر سے شہر کے تمام شاپنگ مالز میں بغیر ویکسی نیشن آنے والے شہریوں کو چیک کیا جائے گا اور گرفتار کرنے کا فیصلہ بھی کیا گیا ہے، اِن ڈور شادی تقریبات پر مکمل پابندی اور آؤٹ ڈور میں مقررہ تعداد کو چیک کیا جائے گا۔کمشنر لاہور نے کہا کہ کورونا کی چوتھی لہر کا سامنا ہے اور لوگوں کی غلفلت سے تیزی سے پھیل رہا ہے۔ یکم ستمبر سے انتظامیہ اور پولیس فلیگ مارچ کے دوران ہر جگہ چیکنگ کرے گی۔

ویکسین نہ لگوانے والے شہری کو شہر میں کوئی سروس فراہم نہیں ہوگی۔ ٹرانسپورٹ ، فیول اور ریسٹورنٹس میں سروسز فراہم بند کی جائے گی۔دکان ، مارکیٹ یا شاپنگ مال پر آنے والے ہر شہری کی ویکسینیشن چیک کی جائے گی۔شاپنگ مالز ہر سر بہمر کیے گئے کاروبار یا دکان کو ایک ہفتے سے پہلے ڈی سیل نہیں کیا جائے گا۔