وزیر خارجہ نے برطانوی ہم منصب سے ٹیلیفونک رابطہ کیا

🗓️ 28 اگست 2021

اسلام آباد (سچ خبریں) تفصیلات کے مطابق وزیرخارجہ شاہ محمود قریشی نے برطانوی ہم منصب سے ٹیلیفونک رابطہ کیادونوں ممالک کے وزراء خارجہ کے درمیان افغانستان کی صورتحال اور علاقائی سلامتی سے متعلق بات چیت کی گئی۔برطانوی وزیرخارجہ نے برطانوی شہریوں کے انخلاء میں پاکستان کا شکریہ ادا کیا۔

وزیرخارجہ شاہ محمود قریشی نے کابل ایئرپورٹ پر دہشتگردی کے واقعے کی پرزورمذمت کی۔وزیرخارجہ شاہ محمود قریشی نے کہا کہ افغانستان کے حوالے سے لگائے تمام اندازے غلط ثابت ہوئے۔

افغانستان میں اچانک تبدیلی کی صورتحال سب کیلئے حیران کن تھی، طالبان کے افغان سرزمین کسی ملک کے خلاف استعمال نہ کرنے کے بیانات حوصلہ افزا ہیں انہوں نے کہا کہ عالمی برادری افغانستان کو تنہائی کا شکار نہ ہونے دے۔وزیرخارجہ شاہ محمود قریشی نے برطانوی ہم منصب سے ”ریڈ لسٹ“ کا معاملہ بھی اٹھایا، انہوں نے کہا کہ پاکستان میں کورونا کیسز میں بہت زیادہ بہتری آئی ہے۔

واضح رہے گزشتپ روز برطانوی حکومت نے پاکستان کو سفری پابندیوں کی ریڈ لسٹ میں برقرار رکھنے کا فیصلہ کیا۔ جبکہ پاکستان نے اس حوالے سے شدید احتجاج اور کوششیں کیں۔ برطانوی حکومت نے 9 اپریل سے پاکستان کو سفری پابندیوں کی ریڈ لسٹ میں شامل کر رکھا ہے۔ برطانوی حکومت نے کرونا کی ڈیلٹا قسم کے پھیلاو کا گڑھ بننے والے بھارت سے پہلے پاکستان کو ریڈ لسٹ میں شامل کر لیا تھا جس پر برطانیہ میں مقیم پاکستانی کمیونٹی اور اراکین برطانوی پارلیمنٹ نے بھی شدید ردعمل دیا تھا۔

بعد ازاں برطانوی حکومت نے بھارت کو ریڈ لسٹ سے نکال کر امبر لسٹ میں ڈال دیا تھا، جبکہ پاکستان کو بدستور ریڈ لسٹ میں برقرار رکھا گیا۔ برطانوی پارلیمنٹ کے اراکین نے اپنی حکومت کے اس فیصلے کو پاکستان کیساتھ امتیازی سلوک قرار دیا تھا۔