وزیر اعلی پنجاب کی اپوزیشن پر شدید تنقید

?️ 18 جون 2021

لاہور(سچ خبریں) وزیراعلیٰ پنجاب سردار عثمان بزدار نے اپوزیشن کو کڑی تنقید کا نشانہ بناتے ہوئے کہا کہ بے مقصد اور بے سمت تقریروں سے قوم کی خدمت نہیں ہوتی۔ذاتی انا اور ضد کی سیاست نے اپوزیشن ٹولےکی منفی سیاست کوبکھیر کر رکھ دیا ہے۔

تفصیلات کے مطابق اپنے بیان میں وزیراعلیٰ پنجاب نے اپوزیشن کو آڑے ہاتھوں لیا اور تنقید کرتے ہوئے کہا کہ پی ڈی ایم کا غیرفطری اتحاد ختم ہوچکا ہے، اپوزیشن والےہر روز بیانات بدلنےکا ورلڈ ریکارڈ قائم کرتےہیں، ذاتی انا اور ضد کی سیاست نے اپوزیشن ٹولےکی منفی سیاست کو بکھیر کر رکھ دیا ہے۔

عثمان بزدار نے کہا کہ ہماری سیاست کا محور عوام کی خدمت ہے،خدمت خلق ہمارا اوڑھنابچھونا ہے، خلوص نیت سے عوا م کی خدمت کررہےہیں اور عوام کےساتھ کھڑے ہیں اور عوامی خدمت کے ایجنڈے کو آگےبڑھا رہےہیں جبکہ اپوزیشن والے خود ستائش میں مبتلا بےربط تقریریں کرنے کےسوا کچھ نہیں کرسکتے۔

وزیراعلیٰ پنجاب نے اپوزیشن کو مخاطب کرتے ہوئے کہا کہ عوام کی خدمت کیلئے بھاشن نہیں بلکہ عوام کےساتھ کھڑاہونا پڑتا ہے۔وفاقی بجٹ پر وزیراعلیٰ پنجاب کا کہنا تھا کہ بہترین اور عوام دوست بجٹ پر ان کی مایوسی سب کےسامنےعیاں تھی۔

شہباز شریف کا نام لئے بغیر تنقید کرتے ہوئے عثمان بزدار نے کہا کہ نام نہاد لیڈر آج بھی وہی بھاشن دے رہےہیں جو وہ پہلے دیتےآئے، قوم کو پتہ نہیں چلا یہ بجٹ پر بحث کا آغاز تھا یا خودنمائی کی جھوٹی داستان، پارلیمنٹ میں رام کہانی سنا کر قوم کا قیمتی وقت ضائع کیا گیا، بے مقصد اور بے سمت تقریروں سے قوم کی خدمت نہیں ہوتی۔