وزیر اعظم کی قیادت میں حکومت مدت پوری کرے گی:وزیر داخلہ

?️ 26 فروری 2022

لاہور (سچ خبریں)  وزیراعلیٰ پنجاب عثمان بزدار سے وفاقی وزیرداخلہ شیخ رشید نے ملاقات کی، اس موقع پر باہمی دلچسپی کے امور، سیاسی صورتحال، راولپنڈی میں ترقیاتی منصوبوں پر تبادلہ خیال کیا۔وزیر داخلہ شیخ رشید کا کہنا تھا کہ وزیر اعظم کی قیادت میں حکومت مضبوط ہے اور  مدت پوری کرے گی۔

دونوں رہنماؤں کی جانب سے اپوزیشن کی انتشار کی سیاست کی مذمت کی گئی، دونوں رہنماؤں نے اپوزیشن کے منفی ہتھکنڈوں کا ڈٹ کر مقابلہ کرنے کے عزم کا اظہار کیا۔عثمان بزدار نے کہا کہ سیاست میں منفی رویے ملک کیلئے نقصان دہ ہیں، اپوزیشن اقتدار کی خاطر سیاسی عدم استحکام پیدا کرنے کی کوشش کررہی ہے۔

وزیر اعلیٰ پنجاب کا کہنا تھا کہ عدم اعتماد کی باتوں میں شکست خوردہ اپوزیشن کی طرح کوئی جان نہیں، جنہیں شوق ہے وہ عدم اعتماد لے آئیں، گھبرانے والے نہیں، اپوزیشن کوعلم ہے کہ حکومت کو نمبر گیم میں سبقت ہے۔شیخ رشید کا کہنا تھا کہ یہ لوگ عدم اعتماد کی باتیں صرف اپنا دل بہلانے کیلئے کررہے ہیں، اپوزیشن کے ناعاقبت اندیش عناصر نےعدم اعتماد کو کھیل سمجھ رکھا ہے۔

انہوں نے کہا کہ نازک حالات میں منفی سیاست والوں کوہوش کے ناخن لینے چاہئیں، وزیراعظم کی قیادت میں حکومت مضبوط ہے اور مدت پوری کرے گی۔وفاقی وزیر کا کہنا تھا کہ وزیراعلیٰ نے گورنمنٹ ایسوسی ایٹ کالج فار گرلز راولپنڈی کیلئے100ملین فنڈ اجراء کا لیٹر دیا، شیخ رشید احمد نے فنڈز کے اجراء پر وزیراعلیٰ عثمان بزدار کا شکریہ ادا کیا۔