وزیردفاع خواجہ آصف کی عمران خان پر تنقید، قومی و عالمی مسائل پر خاموشی پر سوالات اٹھا دیے

?️ 11 ستمبر 2025

اسلام آباد (سچ خبریں) وزیر دفاع خواجہ آصف نے ایکس پر پیغام جاری کرتے ہوئے کہا کہ پاکستان، خطے اور دنیا میں کئی واقعات بانی کے اقتدار کے بعد ہوئے ہیں، غزہ پر قیامت خیز مظالم، پاک بھارت جنگ میں ہماری تاریخی فتح شامل ہے، ہولناک سیلاب، دہشتگردی کیخلاف جنگ اور اب قطر پر اسرائیل کا حملہ شامل ہے۔

خواجہ آصف کا کہناتھا کہ ‏ان تمام واقعات کے دوران یا بعدبانی کے ٹویٹر اکاؤنٹ پر کوئی ذکر سنا ہو تو ضرور بتائیں، ہاں یہ ضرور سنا پڑھا ہو گا،دیسی مرغی کھانے کو نہیں ملتی،قید میں تنہائی ہے، ورزش کا سامان نہیں، ٹریڈ مل میسر نہیں،فلاں سے ملاقات نہیں ہو رہی، سیاسی ورکرز سے ملاقات نہیں، بیگم سے ملاقات نہیں، فلاں کے ساتھ یہ وہ ہو رہا ہے۔

انہوں نے کہا کہ چلو یہ ساری باتیں کر لو لیکن کبھی کبھی ملک وملت کے مسائل پر تھوڑی بات کر لو، قوم اور ہم وطنوں کی خوشیوں اور غم میں شریک ہو جایا کرو، امت مسلمہ کے لیڈر ہونے کا دعویٰ ہے، فلسطین میں ظلم پر مذمت کردو، سیلاب کی تباہیوں پر دکھ کا اظہار کردو،شہیدوں کیلئے دعائیہ کلمات ہی کہہ دو، اگر کوئی قائدانہ کوالٹی ہے تو اس کا اظہار کرو۔