وزیراعظم خیبرپختونخوا میں سیلابی صورتحال سے آگاہ، فوکس ریسکیو اقدام پر ہے۔ عطا تارڑ

?️ 15 اگست 2025

اسلام آباد (سچ خبریں) وفاقی وزیر اطلاعات عطاء اللہ تارڑ نے کہا ہے کہ وزیراعظم شہباز شریف سیلابی صورتحال سے آگاہ ہیں ، آزاد جموں و کشمیر اور خیبر پختونخوا میں امدادی کارروائیاں کرنے کی ہدایت کی ہے۔

تفصیلات کے مطابق وفاقی دارالحکومت سے جاری اپنے ایک بیان میں عطاء اللہ تارڑ کا کہنا تھا کہ شہباز شریف سیلابی صورتحال سے مکمل طور پر آگاہ ہیں انہوں نے چیئرمین ایم ڈی ایم اے لیفٹیننٹ جنرل انعام حیدر کو خیبر پختونخوا اور آزاد کشمیر کی حکومتوں سے مسلسل رابطہ رکھنے اور امدادی سرگرمیوں کو تیز کرنے کی ہدایت کی ہے۔

ذرائع کے مطابق انہوں نے کہا کہ وزیراعظم ہاؤس میں ایک خصوصی سیل بھی قائم کیا گیا ہے جو این ڈی ایم اے سے چوبیس گھنٹے رابطے میں ہے، حالیہ بارشوں اور سیلابی صورتحال کے دوران وزیراعظم شہباز شریف نے تین مرتبہ این ڈی ایم اے کا دورہ کر کے ذاتی طور پر ریسکیو و ریلیف اقدامات کا جائزہ لیا۔

وفاقی وزیر اطلاعات کا کہنا تھا کہ حکومت کا فوکس ریلیف اور ریسکیو اقدامات پر ہے، خیبر پختونخوا میں جاری ریسکیو اور ریلیف آپریشن میں تمام ادارے وسائل بروئے کار لا رہے ہیں، خیبر پختونخوا میں چالیس کے قریب افراد کے لاپتہ ہونے کی اطلاعات ہیں۔

عطاء اللہ تارڑ نے کہا کہ انسانی جانوں کو محفوظ بنانے کے لئے اقدامات اٹھائے جا رہے ہیں، این ڈی ایم اے کے پیشگی آگاہی نظام سے خیبر پختونخوا سمیت تمام صوبائی حکومتوں کو باقاعدگی سے آگاہی فراہم کی جا رہی ہے۔

ان کا مزید کہنا تھا کہ این ڈی ایم اے کا کمانڈ اینڈ کنٹرول سینٹر چوبیس گھنٹے فعال ہے اور صورتحال پر کڑی نظر رکھے ہوئے ہے۔