نجی ٹی وی کے پروگرام میں متنازع گفتگو پر وفاقی وزرا کا شدید ردعمل

?️ 12 فروری 2022

اسلام آباد(سچ خبریں) وفاقی وزرا نے وزیراعظم کی جانب سے وزرا کو کارکردگی کی بنیاد پر سرٹیفکیٹ دینے کے طریقہ کار پر نجی ٹی وی پروگرام میں متنازع گفتگو پر شدید ردعمل کا اظہار کرتے ہوئے کہا ہے کہ تنقید جائز حق ہے لیکن اس کی آڑ میں اخلاقیات سے گرنا انتہائی افسوسناک ہے۔

تفصیلات کے مطابق وزیر خارجہ شاہ محمود قریشی نے ٹی وی پروگرام میں متنازع گفتگو پر شدید ردعمل کا اظہار کیا، اپنے ٹوئٹ میں انہوں نے لکھا کہ نیوز چینل پر اخلاق سے گری باتوں کا استعمال قابل مذمت ہے،تنقید جائز حق ہے لیکن اس کی آڑ میں اخلاقیات سے گرنا انتہائی افسوسناک ہے۔

وفاقی وزیر اطلاعات فوادچوہدری نے ٹوئٹ کیا کہ دو ہزار اٹھارہ سے قانون لانے کی کوشش کررہا ہوں، کابینہ قانون پاس کرے تو ہی گھٹیا اور لچرپن سے نجات ممکن ہے۔وفاقی وزیر اسد عمر نے لکھا کہ جس اخلاق سے گری ہوئی مکروہ باتیں مراد سعید کے بارے میں کی گئی، اگر یہ میرے یا کسی صحافی کے بارے میں کسی پروگرام پر کی جائیں تو ہم کیا مطالبہ کرتے؟ مراد سعید تو انشاءاللہ مزید کامیابی حاصل کرے گا، لیکن ہم نے ایسی گندگی کو ٹی وی سے نا روکا تو معاشرے میں تباہی پھیلے گی۔

وزرا کو کارکردگی پر سرٹیفکیٹ دینے پر نجی ٹی وی پروگرام میں متنازع گفتگو پر سابق مشیر برائے احتساب شہزاد اکبر بھی میدان میں آئے اور لکھا کہ یہ غلیظ اور کم درجے کا سنسنی خیزی ہے، یہ صحافت نہیں سستا تھیٹر معلوم ہوتا ہے، متنازعہ ریمارکس پر غریدہ فاروقی اور ان کے مہمانوں کو معافی مانگنی چاہیے۔

واضح رہے کہ گذشتہ روز ایک نجی ٹی وی چینل پر وزیراعظم کی جانب سے وزرا کو کارکردگی پر سرٹیفکیٹ دینے پر متنازع گفتگو کی گئی تھی، جس پر پیمرا نے سخت ایکشن لیتے ہوئے مذکورہ چینل کی ملک بھر میں نشریات بند کرنے کے احکامات جاری کئے تھے۔