مسلم لیگ ن قیادت کی لندن میں ملاقات

?️ 12 مئی 2022

لندن(سچ خبریں) مسلم لیگ ن کے قائد نوازشریف نے ن لیگ کے رہنماؤں کو اہم شخصیات سے ملاقات کی تفصیلات سے آگاہ کر دیا جب کہ نومبر میں اہم تعیناتی کے حوالے سے بھی بات چیت کی گئی۔

نجی ٹی وی کی رپورٹ کے مطابق لندن میں ن لیگ کے قائد نوازشریف سے ن لیگ کے اہم رہنماؤں کی ملاقات کا احوال سامنے آ گیا۔ملاقات میں نوازشریف نے پارٹی رہنماؤں کو لندن میں چند روز قبل اہم شخصیات سے ملاقات سے متعلق تفصیلات بتائیں۔

جس کے بعد ملکی معاشی صورتحال پر وزیر خزانہ کی جانب سے بتایا گیا کہ ہمیں مشکل حالات سے نکلنے کے لیے 300 ارب روپے کی فوری ضرورت ہے اور اس سلسلے میں سعودی عرب سے 28 فیصد ڈیفر ادائیگیوں پر جلد معاہدہ ہو جائے گا جس کے تحت 2 ارب ڈالر جلد ملیں گے جب کہ آئی ایم ایف سے بھی معاملات آخری مراحل میں ہیں۔

ملاقات میں طے ہوا کہ معاشی معاملات میں بڑے اور اہم فیصلوں پر اسحاق ڈار کی مشاورت لازمی ہوگی جبکہ نومبر میں اہم تعیناتی کے حوالے سے بھی بات چیت کی۔

لیگی رہنما کے مطابق شہباز شریف لندن سے واپسی پر چین کا دورہ کریں گے۔پیپلزپارٹی سے معاملات پر ن لیگ کی اکثریت نے انتخابی الائنس کی مخالفت کی تاہم میثاق جمہوریت ٹو پر عملدرآمد پر سب کا اتفاق کیا۔تحریک انصاف کے رہنماؤں کے خلاف مقدمات بھی بنائے جائیں گے جن میں کرپشن چارجز بھی شامل ہوں گے۔نوازشریف کی وطن واپسی پر بھی غور کیا گیا۔خیال رہے کہ وزیر اعظم شہباز شریف نے پاکستان مسلم لیگ (ن)کے قائد سابق وزیر اعظم محمد نواز شریف سے ملاقات کی جس میں ملکی معیشت سے متعلق گفتگو کی گئی ۔

بدھ کو ہونے والی ملاقا ت میں نواز شریف نے وزیر اعظم بننے پر شہباز شریف کو مبارک باد دی۔ ذرائع کے مطابق ملاقات میں اسحاق ڈار، خواجہ آصف، ایاز صادق، رانا ثناء اللہ، خواجہ سعد رفیق و دیگر بھی موجود تھے ۔ذرائع کا کہنا ہے کہ نواز شریف اور شہباز شریف کی ملاقات کا اہم ایجنڈا ملکی معیشت سے متعلق رہا۔ذرائع کا کہنا ہے کہ ملاقات میں آئندہ ہونے والے الیکشن کے حوالے سے کوئی ایجنڈا نہیں تھا۔