قومی اسمبلی کے اسپیکر واپڈا چیئرمین سے ملاقات کی

🗓️ 16 جولائی 2021

اسلام آباد (سچ خبریں) اسپیکر قومی اسمبلی اسد قیصر سے چیئرمین واپڈا لیفٹیننٹ جنرل (ر) مزمل حسین نے ملاقات کی جس میں صوبہ خیبر پختونخوہ سمیت ملک بھر میں واپڈا کے تحت جاری ترقیاتی منصوبوں پر تفصیلی تبادلہ خیال کیا گیا ۔

چیئرمین واپڈا نے اسپیکر قومی اسمبلی اسد قیصر کو صوبہ خیبرپختونخوہ سمیت ملک بھر میں واپڈا کے تحت جاری منصوبوں پر ہونے والی پیش رفت سے آگاہ کیا ۔

اسپیکر اسد قیصر نے صوبہ خیبر پختونخوہ میں جاری منصوبوں کی رفتار پر اطمینان کا اظہار کیا۔ اسد قیصر نے کہاکہ موجود حکومت نے مالی سال 22-2021 کے بجٹ میں ترقیاتی منصوبوں کے لیے کثیر تعداد میں بجٹ مختص کیا ہے،ملک میں پانی کی قلت پر قابو پانے اور بجلی کی پیداوار میں اضافے کے لیے ڈیموں کی تعمیر ناگزیر ہے،موجود حکومت ڈیموں کی تعمیر کے لیے سنجیدہ اقدامات اٹھا رہی ہے۔