عمران خان کا بیانیہ وطن کی محبت اور اداروں کی بالادستی پر مبنی ہے۔چوہدری پرویز الہیٰ

?️ 28 جولائی 2022

لاہور (سچ خبریں) وزیراعلیٰ پنجاب چوہدری پرویز الہیٰ کا کہنا ہے کہ پنجاب کے عوام عمران خان کے ساتھ کھڑے ہیں۔پنجاب میں پی ٹی آئی کی دوبارہ حکومت عمران خان کے بیانیہ کی فتح ہے۔آج وزیراعلیٰ پرویز الہیٰ سے سابق اسپیکر قومی اسمبلی اسدقیصر نے ایوان وزیراعلیٰ میں ملاقات کی۔ایوب آفریدی بھی اس موقع پر موجود تھے۔

ملاقات میں باہمی دلچسپی کے امور اور سیاسی صورتحال پر تبادلہ خیال کیا گیا۔اسد قیصر اور ایوب آفریدی نے چوہدری پرویز الہیٰ کو وزارت اعلیٰ کا منصب سنبھالنے پر مبارکباد دی۔پرویز الہیٰ نے اس موقع پر کہا کہ عمران خان کا بیانیہ وطن کی محبت اور اداروں کی بالادستی پر مبنی ہیں۔عمران خان نے ہر پاکستان کو آزاد قوم کا شعور دیا۔

چوہدری پرویز الہیٰ نے کہا پنجاب میں ایک بار پھر پی ٹی آئی کی حکومت عوام کو ڈلیور کرے گی۔

صحت کارڈ، احساس پروگرا اور دیگر عوامی منصوبے تیزی سے آگے بڑھیں گے۔اس موقع پر اسد قیصر نے آپ کی بہترین گورننس سے عوام کے مسائل حل ہوں گے۔قبل ازیں نئے وزیراعلیٰ پنجاب چودھری پرویز الہیٰ کا وزیر اعلیٰ ہاوس پہنچنے پر شاندار استقبال کیا گیا۔ وزیراعلٰی پنجاب کو گارڈ آف آنر بھی پیش کیا گیا۔ آج وزیر اعلیٰ پنجاب چودھری پرویزالہٰی سے اراکین اسمبلی ملاقاتیں کریں گے،جبکہ وزیر اعلٰی مختلف اجلاسوں کی صدارت بھی کریں گے۔

واضح رہے کہ گزشتہ روز وزیراعلیٰ پنجاب پرویز الہیٰ کی اسلام آباد میں پی ٹی آئی چئیرمین عمران خان سے ملاقات ہوئی۔ ملاقات میں ق لیگ کے رہنما مونس الہیٰ بھی موجود تھے۔ وزیراعلیٰ پرویز الہیٰ نے ایک بار پھر عمران خان کے ساتھ چلنے کے عزم کا اظہار کیا۔ملاقات کے دوران سبطین خان کو اسپیکر پنجاب اسمبلی بنانے کا بھی فیصلہ کیا گیا۔ پرویز الہیٰ نے کہا کہ عمران خان پنجاب اسمبلی توڑنے کا کہہ دیں تو ایک منٹ بھی نہیں لگاؤں گا۔