عمران خان پانچ سال پورے کریں گے: شیخ رشید

?️ 18 جون 2021

اسلام آباد(سچ خبریں) وفاقی وزیر داخلہ شیخ رشید نے کہا ہےکہ وزیراعظم عمران خان پانچ سال پورے کریں گے، اپوزیشن پہلے ہی مری ہوئی ہے وہ ہمارا کچھ بھی بگاڑ نہیں سکتی، اسمبلی میں جو کچھ ہوا اس سے جمہوریت  عزت نہیں ملی بلکہ اسے نقصان پہنچا ہے۔

اسلام آباد میں میڈیا سے گفتگو کرتے ہوئے شیخ رشید نے کہا کہ اسمبلی میں 3 دن پہلے جو ہوا اس سے جمہوریت کو عزت نہیں ملی اور ہم نے اپوزیشن کے ساتھ جوڈو کراٹے نہیں کرنے کیونکہ اپوزیشن پہلے ہی مری ہوئی ہے۔

وزیر داخلہ کا کہنا تھا کہ ہمارا مشن ہے کہ اسلام آباد میں جرائم ختم کریں اور آئی جی اسلام آباد سے کہتا ہوں کہ شہر کو منشیات سے پاک کرنا ہے، چھوٹے موٹے غریبوں کو پکڑ کے بڑوں کو جانے نہیں دینا کیونکہ یہاں قانون غریبوں کیلئے حرکت میں آتا ہے۔

شیخ رشید نے مزید کہا کہ اسلام آباد میں سکیورٹی کے لیے بہتر اقدامات کرنے جارہے ہیں جب کہ وزارت داخلہ لوگوں کو ای پاسپورٹ بھی مہیا کرنے جارہا ہے، اسلام آباد میں خواتین کا ایک بازار بھی بنانے جارہے ہیں جہاں بس خواتین کی دکانیں ہوں گی، اس حوالے سے ڈی سی کو ہدایت دے دی ہے۔

انہوں نے کہا کہ پولیس کی خرابی ہوگی تو میڈیا انہیں نہیں چھوڑتا، ہیروئن اور آئس کے بڑے ڈیلروں کو پکڑا جائے، دارالحکومت کو منشیات سے پاک کیا جائے۔وزیرِ داخلہ کا یہ بھی کہنا ہے کہ غریب قانون کی زد میں آ جاتا ہے، غریب کیلئے قانون حرکت میں آتا ہے، بڑے لوگوں کی شان دیکھ کر ان کے خلاف ایکشن نہیں لیا جاتا۔