عمران خان نے مذاکرات کے تیسرے دور میں تحریری مطالبات پیش کرنے کی ہدایت کردی، وقاص اکرم

پشاور: (سچ خبریں) پاکستان تحریک انصاف کے مرکزی سیکریٹری انفارمیشن شیخ وقاص اکرم نے کہا ہے کہ مذاکرات میں حکومت نے کہا کہ تحریری طور پر مذاکرات پیش کیے جائیں، بانی چیئرمین نے ہدایت کی ہے کہ تیسرے دور میں مطالبات تحریری طور پر پیش کیے جائیں۔

پشاور میں پریس کانفرنس کرتے ہوئے کہا انہوں نے کہا کہ عمران خان نے القادر ٹرسٹ کا فیصلہ مذاکرات سے نتھی نہیں کیا، گزشتہ 3 ماہ سے بانی پی ٹی آئی کے ساتھ ہماری ملاقات بند کردی گئی ہے، یہ ہمارا حق ہے کہ ہم اپنے پارٹی کے قائد کےساتھ ملکر معاملات طے کریں۔

شیخ وقاص اکرم نے کہا کہ بانی چیئرمین نے ہدایت کی کہ مطالبات تحریری طور پر تیسرے دور میں پیش کیے جائیں، تیسرا دور ہونا تھا، اس لیے ہمیں ہدایت ہوئی کہ تحریری طور پر مطالبات پیش کریں۔

ان کا کہنا تھا کہ ہمارے تحفظات اس بات پر تھے کہ حکومت ہماری کمیٹی کی ملاقات بانی چیئرمین کے ساتھ نہیں کراسکتی، عمران خان کو سہولیات کی فراہمی کی باتیں جھوٹی ہیں، بانی چیئرمین کو دہشتگردوں کی طرح جیل میں بند کیا گیاہے، بانی چیئرمین تک اخبارات کی رسائی بند کردی گئی ہے، انہیں قید تنہائی میں رکھا گیا ہے۔

سیکریٹری اطلاعات پی ٹی آئی نے کہا کہ بانی چیئرمین کو جیل مینیو کے مطابق کھانا دیا جاتا ہے،حکومت اس سوچ میں ہیں کہ اگر یہ بندہ جیل سے باہر آگیا تو ہمارے ساتھ کیا ہوگا؟

انہوں نے کہا کہ اٹک اور جہلم میں ہمارے قیدیوں کے ساتھ ناروا رویہ رکھا گیا ہے، 40،40 قیدیوں کو ایک لاک اپ میں بند کیا گیا ہے, باہر دھوپ کےلیے نہیں نکالا جاتا، قیدیوں کے حقوق کی خلاف ورزی کی ہورہی ہے، یہ رویہ ٹھیک نہیں، ان بچوں کو اپنا دشمن بنا رہے ہیں، احتجاج کرنے کی سزا یہ دی جارہی ہے کہ ان بچوں کو ڈاکٹر تک رسائی بھی نہیں دی جارہی، ہمارے قیدیوں کے ساتھ پنجاب کی جیلوں میں ناروا سلوک کیا جارہی ہے۔

شیخ وقاص اکرم نے کہا کہ سیل میں گنجائش سے زائد قیدیوں کو رکھا جا رہا ہے، ہمارے سیاسی قیدی سورج نہیں دیکھتے، پیشی کے موقع پر سارا دن وین میں گھمایا جاتا ہے، یہ ہمارے قیدی جب جیلوں سے نکلیں گے وہ آپ لوگوں سے نفرت کریں گے، بیشتر قیدی بیمار ہیں جنھیں ڈاکٹر کی سہولیات نہیں دی جارہی۔

رہنما پی ٹی آئی نے کہا کہ بانی چیئرمین کی فیملی اور بشرا بی بی کے حوالے سے منظم کمپین چلائی جارہی ہے، پی ٹی آئی کے نوجوان پرامن سیاسی ورکر ہیں، باشعور ہیں، نوجوانوں کو سیاست سے دور رکھنے کی باتیں کی جارہی ہیں، میاں نواز فیملی کا رنجیت سنگھ سے بڑا دور گزرا ہے، مزاکراتی کمیٹی کی بانی چیئرمین سے ملاقات انتہائی ضروری ہے۔