عمران خان ملکی مفادات سے کھیلنے، آئین شکنی کرنے سے بھی نہیں ڈرتا، مریم اورنگزیب

?️ 18 مارچ 2023

اسلام آباد:(سچ خبریں) وفاقی وزیر اطلاعات و نشریات مریم اورنگزیب نے سابق وزیر اعظم عمران خان پر سخت تنقید کرتے ہوئے کہا ہے کہ انہیں عدالتیں مسلسل بلا رہی ہیں لیکن وہ پیش نہیں ہوئے، پیغام ہے فارن ایجنٹ، گھڑی چور، آئین وقانون سے بالاتر ہے، وہ ملکی مفادات سے کھیلتے ہوئے، آئین شکنی کرتے ہوئے بھی نہیں ڈرتا۔

وفاقی وزیر اطلاعات و نشریات نے اسلام آباد میں پریس کانفرنس سے خطاب کرتے ہوئے کہا کہ عمران خان آج عدالت میں جا رہے ہیں جہاں ان پر توشہ خانہ کیس میں فرد جرم عائد ہونی ہے، 18 اگست 2022 سے وہ عدالتوں میں پیش نہیں ہو رہے۔

ان کا کہنا تھا کہ 18 اگست، 21 اکتوبر، 7 جنوری، 31 جنوری، 24 فروری ، 9 مارچ اور 13 مارچ کو بھی پیش نہیں ہوئے اور انہیں استثنیٰ مل گیا، پھر 13 مارچ کو ان کے ناقابل ضمانت وارنٹ گرفتاری جاری ہوئے، پولیس کو کہا گیا کہ انہیں گرفتار کرکے پیش کیا جائے۔

ان کا کہنا تھا کہ عمران خان غیر ملکی میڈیا کو کہتے ہیں کہ میرے پاس حفاظتی ضمانت ہے، وہ جھوٹ بولتے ہیں، پھر کہتے ہیں کہ میری جان کو خطرہ ہے، میں معذور ہوں، بزرگ ہوں، بیمار ہوں جس کی وجہ سے میں عدالت میں پیش نہیں ہوسکتا۔

وزیر اطلاعات نے کہا کہ اگر ان کے پاس حفاظتی ضمانت تھی تو پھر وہ بیمار اور معذور کیوں ہیں، جب پولیس گرفتار کرنے آئی تھی تو اس کو حفاظتی ضمانت دکھادیتے، اگر ضمانت موجود تھی تو پھر انڈر ٹیکنگ کیوں دی۔

مریم اورنگزیب نے کہا کہ عمران خان آج کالعدم دہشت گرد تنظیموں کے نمائندے، ڈنڈے، غلیلیں لے کر عدالت میں پیش ہو رہے ہیں، جن جماعتوں کے پاس مقبولیت ہوتی ہے انہیں کالعدم تنظیموں کے لوگ حفاظت کے لیے نہیں چاہیے ہوتے، وہ عدالتوں میں ڈنڈے لے کر نہیں جاتے۔

انہوں نے کہا کہ ملک میں یہ نہیں ہوسکتا کہ توہین عدالت پر تو سزا ملے لیکن اسی عدالت کے احکامات کی تعمیل کے لیے جانے والی پولیس پر حملے کیے جائیں اور پھر حملہ آوروں کو ریلیف بھی مل جائے، پھر ریاست کی کوئی حیثیت نہیں رہتی۔

ان کا کہنا تھا کہ ایک عدالت کہے کہ ایک اشتہاری اور مجرم کو پکڑ کر پیش کرو اور دوسری عدالت اسے ریلیف پیکج دے دے، زمان پارک میں یہ پیٹرول بم پولیس اور رینجرز کی وینز پر نہیں پھینکے گئے یہ ان عدالتی احکامات پر پھینکے گئے ہیں جن کے اوپر پولیس انہیں گرفتار کرنے گئی تھی۔

مریم اورنگزیب نے کہا کہ یہ ملکی مفادات سے کھیلتے ہوئے بھی نہیں ڈرتا، سازش کرتے ہوئے بھی نہیں ڈرتا، آئین شکنی کرتے ہوئے بھی نہیں ڈرتا، یہ شخص نوجوانوں سے ریاست پر حملے کرواتا ہے، آج ایک چور ایک کرپٹ جھوٹا اور دہشت گرد کھلے عام پھر رہا ہے۔

قبل ازیں وفاقی وزیر اطلاعات و نشریات نے ٹوئٹر پر جاری بیان میں کہا کہ پولیس کے سر پھاڑنے ،عدالتی نظام ، ریاست پر حملہ آور دہشت گرد کو ضمانت کا بنڈل پیکج ملا۔

مریم اورنگزیب نے کہا کہ ریاست کے لیے زخم کھانے والوں کو پیغام ہے کہ فارن ایجنٹ گھڑی چور آئین ،قانون اور نظام عدل سے بالاتر ہے ۔

وزیر اطلاعات نے کہا کہ چور، کرپٹ، جھوٹا اور دہشتگرد کھلے عام گھوم رہا ہے، ایک شخص ڈنڈے،کلاشنکوف،غلیلیں لیکر عدالت جاتا ہے۔ کیا انصاف جتھوں اور دھمکیوں سے ڈر گیا ہے؟

اپنے ایک ٹویٹر میں وفاقی وزیر اطلاعات و نشریات نے کہا کہ دہشت گرد عمران نے پٹرول بم پولیس اور رینجرز پر نہیں عدالتی احکامات پر پھینکے ہیں۔