عدالت سے شہباز شریف کو ایک اور ریلیف مل گیا

?️ 20 جون 2022

لاہور(سچ خبریں) رمضان شوگر ملز کیس میں وزیراعظم شہباز شریف کی مستقل حاضری معافی کی درخواست منظور کر لی گئی، احتساب عدالت نے محفوظ فیصلہ سنایا۔

احتساب عدالت لاہور میں وزیراعظم شہباز شریف اور وزیراعلی حمزہ شہباز کے خلاف رمضان شوگر ملز ریفرنس کی سماعت ہوئی، شہباز شریف نے عدالت کے روبرو پیش ہوکر حاضری مکمل کروائی، ان کی مستقل حاضری معافی کی درخواست پر وکیل نے دلائل کے مکمل کئے۔ شہباز شریف کے وکیل نے استدعا کی کہ شہباز شریف کے نمائندے محمد نواز کو انکی جانب سے حاضری کے لیے مقرر کیا جائے ،شہباز شریف وزیراعظم پاکستان ہیں انہوں نے کبھی ضمانت کا غلط استعمال نہیں کیا۔

شہباز شریف نے معزز عدالت کے روبرو اپنا موقف بیان کرتے ہوئے کہا کہ بلاجواز حاضری معافی کی درخواست دائر نہیں کی، قومی ذمہ داریاں ادا کرنی ہیں، حاضری معافی کی درخواست مسترد ہوگی تو پھر بھی پیش ہوں گا، میرے ترقیاتی کاموں کے حقائق آپکے سامنے ہیں۔ انہوں نے مزید کہا کہ گنے کے ایتھنول پر میں نے ٹیکس لگایا، شوگر ملز مالکان نے ہائیکورٹ میں درخواست دائر کردی، میرے بیٹے کی شوگر مل بھی ہے جہاں ایتھنول پر ٹیکس عائد کیا، میرے بیٹے کی شوگر مل کو ڈھائی ارب روپےکا نقصان پہنچا۔

نیب کے پراسکیوٹر نے شہباز شریف کی مستقل حاضری معافی کی درخواست کی مخالفت کردی ، انہوں نے کہا کہ شہباز شریف کو مستقل حاضری معافی دینے کی ٹھوس وجوہات نہیں ہیں،شہباز شریف کا حاضری معافی کی درخواست میں میڈیکل سرٹیفکیٹ بھی نہیں دیا گیا۔ احتساب عدالت کے جج ساجد اعوان نے وکلا کے دلائل مکمل ہونے پر فیصلہ محفوظ کر لیا جو کچھ دیر بعد سناتے ہوئے حاضری معافی کی درخواست منظور کر لی۔