صدر کے استعفی یا آرمی چیف کے صدارت سنبھالنے کا کوئی امکان نہیں۔ وزیر داخلہ

?️ 10 جولائی 2025

اسلام آباد (سچ خبریں) صدر مملکت کے استعفے سے متعلق سوشل میڈیا کی خبروں پر وفاقی وزیر داخلہ محسن نقوی کا سخت ردعمل سامنے آگیا۔

تفصیلات کے مطابق وفاقی وزیر داخلہ محسن نقوی نے سماجی رابطے کے پلیٹ فارم ’ایکس‘ پر ایک پوسٹ کے ذریعے صدر مملکت، وزیراعظم اور آرمی چیف کے خلاف خبروں کو گمراہ کن اور بدنیتی پرمبنی قرار دے دیا۔ واضح کیا کہ صدر زرداری کے استعفے کی کوئی تجویز زیر غور ہے نہ ہی فیلڈ مارشل عاصم منیر کو صدر کے عہدے میں کوئی دلچسپی ہے۔

ذرائع کے مطابق محسن نقوی نے واضح کیا کہ آرمی چیف کی صدارت سنبھالنے کی نہ کوئی خواہش ہے اور نہ ہی کوئی تجویز موجود ہے۔ محسن نقوی نے صدر مملکت کے مؤقف کو بیان کرتے ہوئے کہا کہ صدر جانتے ہیں کہ یہ جھوٹ کون پھیلا رہا ہے اور یہ بھی جانتے ہیں کہ جھوٹ کس مقصد کے لیے اور کس کو فائدہ دینے کے لیے پھیلایا جا رہا ہے۔

انہوں نے کہا کہ صدر کے مسلح افواج کی قیادت سے تعلقات مضبوط اور احترام پر مبنی ہیں جب کہ آرمی چیف کی توجہ صرف اور صرف پاکستان کی مضبوطی اور استحکام پر مرکوز ہے۔ محسن نقوی نے لکھا کہ یہ بدنیتی پر مبنی مہم دشمن غیر ملکی ایجنسیوں سے جڑی ہو سکتی ہے جو پاکستان کے داخلی استحکام کو کمزور کرنے کے لیے سوشل میڈیا کو بطور ہتھیار استعمال کر رہی ہیں۔

وزیرداخلہ نے کہا کہ جھوٹ، پراپیگنڈے اور بدنیتی پر مبنی مہمات کے باوجود ریاستی ادارے پرعزم ہیں کہ پاکستان کے استحکام اور سالمیت کو ہر صورت یقینی بنایا جائے گا۔